iklan

ERMERA, MUNISÍPIU

Dom Virgílio louva sarani Letefoho nia unidade

Dom Virgílio louva sarani Letefoho nia unidade

Misa enseramentu ba Kruz Joven Letefoho. Imajen Tatoli/ Hortencio

ERMERA, 14 setembru 2023 (TATOLI) – Eminénsia Dom Virgílio Cardeal do Carmo da Silva louva ho sarani katólika Postu Adminstrativu Letefoho, Munisípiu Ermera nia unidade ne’ebé metin tebes.

“Ohin momentu ida ne’e apresia ba parokia ida ne’e, durante tinan ida-nia laran, Kruz joven hela ho imi, imi hametin liután imi-nia unidade no hamenus violénsia lubuk ida, unidade ne’ebé imi iha, mantein nafatin ba oin, atu imi sai ezemplu ba munisípiu seluk”, Dom Virgílio iha nia omília bainhira prezide misa enseramentu ba Parókia Letefoho entrega hikas Kruz Joven ba Parókia Laleia, iha Letefoho, kinta ne’e.

Nia husu ba sarani Letefoho hotu atu halo tuir nafatin Maromak nia liafuan di’ak ne’ebé hakerek ona iha biblia sagradu.

“Rona Maromak nia liafuan di’ak ne’ebé haklaken ona ba ema hotu, keta baruk hakbesik ba eukaristia, keta baruk ba konfesa no keta baruk ba misa, rua ne’e mak ai-rin rua ne’ebé metin iha ita-nia moris hodi fó forsa nafatin mai ita nu’udar sarani”, Dom Virgilio dehan.

Nia haklaken, sarani los tenke hateten, lae ba lia bosok, lae ba hahalok abiru, lae ba baku malu, oho malu, fahe malu, lae ba forma violénsia oioin ne’ebé sei buras hela iha uma kreda nia lidun sira.

“Iha kruz leten, Maromak hatudu nia domin ne’ebé aas liu, laiha ida aas liu Maromak nia domin, Maromak mak domin. Hahalok isin nian mak dala barak sobu ita-nia moris, inimigu moris nian mak sala”, nia husu.

Iha selebrasaun misa enseramentu ne’e, Ministru Juventude Desportu Arte no Kultura (MJDAK) Nélio Isaac Sarmento iha nia diskursu, hateten eventu importante rua ne’ebé hala’o misa enseramentu ba vizita Kruz Joven no Jornada Juventude Katólika Timor-Leste ba tinan ida ne’e hatudu signifikativu ba jersaun kontinuadór nasaun ida ne’e.

“Ita-nia nasaun presiza duni iha joven sira ne’ebé kreativu, unidu iha pensamentu no iha vizaun atu priénse vida moris nasaun ida ne’e nian ho kualidade. Governu agradese wain ba konferénsia episkopál Timor-Leste liuhosi Dom Virgilio Cardeal do Carmo da Silva, Dom Norberto Amaral no Dom Leando atu ita hamutuk transforma karakter joven sira hotu la’os de’it iha vida espirituál maibé tenke hatene obedese ba regra Estadu nian atu hatur dame iha nasaun ida ne’e”, Nélio dehan.

Nu’udar governante sente kontente tanba Jornada Juventude Katólika Timor-Leste Dioseze Dili hola inisiativa di’ak tebes hodi vizita família sira iha área rurál hodi buka hatene kondisaun joven vurneravél sira iha baze hodi enkoraza joven maluk sira atu iha esperansa katak Maromak la dook hosi ema.

“Ida-ne’e mak hatudu ita-nia fraternidade katak moris iha mundu ida ohin loron, la presiza sai inimigu, la presiza rai ódiu ba malu, la presiza hatudu liman ba malu tanba iha Maromak nia oin ita ida de’it”, ministru afirma.

Kruz joven vizita Letefoho durante tinan ida semana ida, durante nia vizita sai tama aldeia hamutuk 67 no suku ualu iha Postu Administrativu Letefoho.

Kruz santu ne’e na’in mak Parokia Laleia ne’ebé eziste iha tempu okupasaun Indonézia no vizita ona sarani katólika Timor-Leste laran tomak to’o ohin loron.

Parokia Letefoho simu Kruz santu ne’e iha 25 agostu 2022 hosi Parókia Lolotoe Postu Administrativu Bobonaro Munisípiu Bobonaro no iha 14 setembru 2023 Kruz santu ne’e Parókia Letefoho entrega hikas ba Parókia Laleia Munisípiu Manatuto.

Durante prezensa iha Letefoho, sarani katólika sira hala’o atividade importante ho pilar haat mak hanesan, pastorál, infrastrutura, arte kultura no liturzia.

Pilar pastorál nian mak trasa planu hodi lori Kruz Joven vizita Suku no Aldeia hotu iha Letefoho laran, fó formasaun ba joven sira, halibur joven sira hosi kamada oioin hanesan arte marsiál no rituál sira hodi kria amizade.

Halibur mós joven sira ho atividade ne’ebé hanaran Jornada Juventude Parókia Letefoho (JJPL) halibur joven hamutuk ema na’in 400. JJPL la’o ho vizaun tolu mak hanesan Unidade, Amizade no Responsabilidade, atu atinje buat tolu ne’e joven sira la’o ho pilar tolu importante hanesan, orasaun, formasaun no animasaun.

Pilar ba infrastrutura nian, halo uma laku kada aldeia hamutuk 67, estasaun tolu, kapela tolu, harii salaun parókia nian, reabilitasaun igreza no seluk tan gasta orsamentu hamutuk $174,500.26 ne’ebé kontribui hosi komunidade aldeia 67 iha Letefoho

Atividade ba tinan ida-nian ne’e hetan fundu hosi komunidade Letefoho, hahú liuhosi kontribuisaun orsamentu hosi kategoria ne’ebé la hanesan, estudante kada ema ida hatama $0,25 ba ensinu báziku, ensinu sekundáriu $0,50, inan aman hatama $5, funsionáriu, veteranu hatama ema ida $50.

Apoiu hosi Universidade da Paz ne’ebé fó direta hosi Reitór Adolmando Amaral hamutuk $10.000 ba abertura programa hotu no iha taka programa hotu iha misa enseramentu ajuda tan $10.000 ho nune’e UNPAZ kontribui $20.000.

Apoiu hosi komunidade Letefoho iha Austrália hamutuk osan $25.000, Eminénsia Dom Virgilio apoiu $25.000 iha primeira atividade sira hahú, konferénsia espiskopál Timor-Leste apoiu $10.000, kontribuisaun hosi dioseze tolu Malianan Dili no Baucau hamutuk $3,600.

Atividade durante tinan tomak ne’e mós parokia Letefoho tau orsamentu $8,000, parokia Gleno $1,000, parokia Railaco $1,000, parokia Ermera $1,000, parokia Atsabe $500 no parokia Hatulia $500.

Pilar arte kultura nian mak animasaun, lia na’in dadoli, dansa kulturál ai-han kultural no seluk tan.

Pilar ikus mak liturzia ne’ebé sai sentru ba atividade hotu, prepara litirjia di’ak, prepara fatin dignu ba selebrasaun misa iha parokia no aldeia sira hotu

Ba programa enseramentu nian nafatin hetan apoiu orsamentu hosi Eminénsia Dom Virgilio Cardeal hamutuk $2,600, apoi hosi Governu MJDAK hamutuk $4,900, Prezidente Repúblika apoiu $1000.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!