MAE kontribui reseita publisidade $3.238,98 ba kofre Estadu
DILI, 15 setembru 2023 (TATOLI)—Diretora Jerál Organizasaun Urbana iha Ministériu Administrasaun Estatál (MAE), Maria Florindo, hateten iha janeiru-agostu 2023 ne’e MAE kontribui reseita publisidade ne’ebé ekipa rekolla iha terrenu hamutuk $3.238,98 ba kofre Estadu.
Notísia Relevante: MAE kontribui reseita taxa publisidade $156.578.32 ba kofre Estadu
“Konforme dadus ne’ebé ha’u hetan hosi xefe Departamentu organizasaun urbana nian iha ne’ebá hatudu reseita publisidade iha territóriu Dili nian ne’ebé to’o iha fulan jullu 2023 hamutuk $3.238 98. Ba fulan agostu no setembru seidauk ajusta no ida-ne’e mak ha’u simu hosi Departamentu refere,” Maria Florindo hateten ba Agência Tatoli, iha salaun INAP, Dili, sesta ne’e.
Xefe Departamentu Asisténsia Toponímia Urbana, Abel Bere, hateten durante publisidade eziste hosi tinan 2017 mai to’o 2023 hamutuk $926.134.63 ne’e kompostu hosi tinan 2017 osan hamutuk $24.919,01, tinan 2018 iha $213.724.07, tinan 2019 iha $149.857.87, tinan 2020 iha $212.150.55, tinan 2021 iha $132,545,55, tinan 2022 iha $162.412.06 no tinan 2023 hamutuk $30.606.09.
“Iha taxa atividade publisidade ne’e, Servisu Lisensiamentu Publisidade Munisipiu Dili rekolla taxa iha área Avenida Nicolau Lobato no Liberdade Imprensa iha kapitál Dili. Parte Dili publisidade hosi kompañia internasional Instant Shop inklui banner Timor Telekom, Telekomsel maibé ba munisípiu sira maiória Telekomsel ho Timor Telekom,” nia hateten.
Nia hateten, osan kontribuisaun reseita ba kofre Estadu ne’e bazeia ba dekretu-lei númeru 51/2016 ne’ebé mak ko’alia kona-ba lisensiamentu publisidade maibé dekretu-lei ne’e mós halo ona alterasaun ba dekretu-lei númeru 31/2017.
“Dekretu-lei ida-ne’e ami halo ona sensibilizasaun ba iha teritórriu nasionál tomak no mós mensajen publisidade ne’e eziste ona durante tinan 2017 to’o agora,” nia dehan.
Jornalista : Osória Marques
Editór : Cancio Ximenes
