Iha BS, tipu ran O+ estoke la iha
DILI, 19 setembru 2023 (TATOLI)—Iha Banku ran (BS, sigla portugés), Hospital Nacional Guido Valadares (HNGV), tipu ran O+ estoke la iha, iha meadu setembru ne’e nia laran.
“Iha fulan agostu, ita hala’o servisu atendementu hanesan baibain, tanba relasiona ho komemorasaun Loron Referendum nian, mak iha instituisaun barak mak fó ran ba Banco de Sangue. Entaun, ita garante estoke ne’e iha. Maibé, to’o agora meadu setembru, ita-nia estoke A, B, AB ita garante hela maibé O+ mak estoke la iha,” Xefe BS, Cladio Julio Quintão, informa iha nia serbisu-fatin BS, HNGV, ohin.
Xefe Cladio Julio relata, iha fulan agostu estoke ran iha Banco de Sangue sufisiente hodi responde ba pasiente sira ne’ebé presiza tulun.
Iha agostu ne’e, totál pakote ne’ebé mak BS rekolla hamutuk 635 husi númeru ne’e tama iha Banco de Sangue, hodi halo transfusaun, tanba sira ne’e livre tiha ona husi moras hotu.
“Iha tipu ran A ne’e hamutuk 154, B 130, AB 29, no O iha 322 maibé ran hirak ne’e pasiente sira presiza barak liu mak tipu ran O, entaun to’o meadu setembru ne’e estoke tipu ran O mamuk ona,” nia afirma.
Ezekutivu ne’e esplika, estoke ran ba fulan agostu nian bele dehan sufisiente, maibé agora dadauk númeru pasiente ne’ebé mak atu halo transfusaun ran ne’e kada loron nafatin sa’e, entaun seidauk garantia katak estoke ran ne’e nafatin iha.
“Pasiente sira iha ne’e iha númeru ne’ebé aas tebes atu halo transfusaun, ba iha ospitál referál sira ne’e ladun, tanba pasiente sira ne’ebé mak atu halo transfusaun ran ne’e sira refere hotu mai iha HNGV. Entaun, kada loron Banco de Sangue halo transfusaun ran ba pasiente sira ne’e bele to’o 20 resin, maibé ba loron sábadu ho domingu ne’e konforme vizita husi médiku sira, mak foin halo transfusaun, maibé iha sábadu ho domingu mak pasiente ne’ebé mak urjentimente presiza ran, entaun ita halo transfusaun ran ba sira,” nia dehan.
Iha fulan agostu pasiente sira ne’ebé hetan infesaun hanesan, hepatitis B, hepatitis C, HIV no sifilis, hamutuk 55 husi númeru ne’e sira labele halo doasaun ran.
“Ba ema sira ne’ebé mak mai halo doasaun ran mak hetan infeksaun ruma, ami haruka sira ba kontinua tratamentu, tanba sira-nia ran ne’e labele uza ba pasiente sira,” nia konklui.
Notísia relevante:Estoke ran B menus iha banku sangue HNGV
Jornalista: Felicidade Ximenes
Editór : Rafael Ximenes de A. Belo
