BAUCAU, 20 setembru 2023 (TATOLI) – Autoridade Administrasaun Munisipál garante realizasaun eleisaun suku iha Lautém sei sussesu iha fulan-outubru mai.
Sekretáriu Autoridade Administrasaun Munisípiu Lautém, Jacinto da Costa, esplika, razaun susesu tanba autoridade administrasaun hamutuk ho Sekretariadu Tékniku Administrasaun Eleitorál (STAE) no lideransa komunitária sira komesa ona hala’o enkontru kona-ba preparasaun ne’ebé tuir planu prosesu rejistrasaun ba kandidatura xefe suku, aldeia no membru konsellu suku sei hahú iha loron-13 fulan-outubru.
“Ha’u fiar katak realizasaun elisaun suku iha Lautém sei laiha problema no sei sussesu,” Sekretáriu Administrasaun Lautém informa ba Agência TATOLI iha Vila Antiga, kaurta ne’e.
Xefe suku sesante sira iha Lautém iha koñesementu kona-ba realizasaun eleisaun suku, liuliu tuir kna’ar no konstribusaun ba preparasaun implementasaun lei podér lokál no desentralizasun administrativa tuir dekretu-lei númeru 9/2016 kona-ba xefe suku no dekreta-lei númeru 3/2016 kona-ba transferénsia podér lokál inklui altersaun daruak dekretu-lei númeru 54/2020.
Tuir rekizitu atu prepara ba implementasaun lei podér lokál no desentralizasaun adminstrativa, papél xefe suku importante atu hola parte desizaun no apresiasaun liuhosi planeiamentu no implementasaun hanesan iha reuniaun koordenasaun munisipál no reuniaun konsellu konsultativu munisipál.
“Hosi suku sira iha Lautém, xefe suku balun deside atu rekandidatura hikas no balun foun inklui feto sira maibé klareza liu depois rejistrasaun mak foin hatene,” Jacinto da Costa akresenta.
Total suku iha munisípiu Lautém hamutuk 34 hosi postu admistrativu Luro hamutuk suku neen, Ilomar hamutuk neen, Lautém 10, Tutuala rua, Lore rua no Lospalos hamutuk suku ualu.
Notisia relevante: Munisípiu Lautém propoin millaun $15 iha OJE 2024
Jornalista : Natalino Belo
Editór : Evaristo Soares Martins
