Xefe suku Juanico preokupa postu saúde Leber seidauk funsiona
BONONARO, 20 setembru 2023 (TATOLI) – Xefe suku Leber, postu administrativu Bobonaro, Munisípiu Bobonaro, Juanico da Silva, preokupa ho postu saúde foun ne’ebé antigu Ministra Saúde, inaugura ona iha fulan-maiu liubá to’o agora seidauk funsiona hodi halo atendimentu saúde ba komunidade sira.
Nia hato’o asuntu ne’e liuhosi diálogu nível postu ne’ebé organiza hosi Autoridade Munisipál Bobonaro, kuarta ne’e.
Notísia Relevante:Komunidade Leber halerik Eletrisidade – Estrada, PR sei hato’o ba Governu
“Agora daudaun edifísiu postu saúde Leber, ne’ebé mak ninia obra ne’e hotu ona, maibé pesoál saúde sira seidauk servisu hodi atende pasiente sira, ne’ebé odomatan sira sei taka hela to’o agora,” nia hateten iha salaun administrasaun postu Bobonaro.
Ba kestaun ne’e, Diretór Servisu Munisipál Saúde, João Cardoso, klarifika fasilidade saúde foun refere sei la funsiona ho razaun rua. Ida tamba kondisaun klima hosi fulan-abríl to’o jullu la permite atu mobiliza medikamentu no sasán sira seluk hosi postu saúde tuan ba foun.
Razaun ida seluk tanba rai-halai estraga moru protesaun balun, kompañia Glove Unipesoál Lda foin lalais ne’e mak kompleta fali.
Diretór João esklarese Lolos iha fulan agustu atu mobiliza ona sasán,maibé la konsege tanba tranporte operasionál sira kuaze barak mak kondisaun ladi’ak.
“Semana ida ka rua ne’e kareta balun di’ak ona, ha’u la promete semana ida, espera setembru ne’e la hotu, postu saúde foun ita uza ona, ha’u promete ida-ne’e,” nia katak.
Suku Leber iha aldeia haat hanesan; Leber-Taz, Mabelis, Holbese no Holsa-Taz ho totál abitante 1000-resin no uma-kain 300-resin.
Notísia relevante Xefe Estadu husu governu tau-matan ba agrikultór Leber
Jornalista: Sérgio da Cruz
Editór: Evaristo Soares Martins
