VIQUEQUE, 21 setembru 2023 (TATOLI)–Xefe suku Uaitame, postu Uatulari, munisípiu Viqueque, José do Rosário, motiva joven sira atu kria atividade ortikultura hodi sustenta nesesidade.
“Uluk avo sira dehan osan ne’e iha rai okos hela. Ha’u sente avo sira-nia liafuan ne’e loos tanba bainhira ita baruk lakoi kehe tuir osan maka sei laiha. Se ita badinas halo to’os, halo ortikultura hanesan modo no hetan rezultadu di’ak, ema sei sosa ita-nia modo hodi bele sustenta moris. Do que joven sira tuur iha dalan bolu malu hemu tua no tuur haleu hemu kafé, sei hetan osan difísil no kria problema oin-oin,” Autoridade komunitária hateten ba agência Tatoli, hafoin abertura formasaun ba grupu ortikultuta, iha aldeia Macadique, suku Uaitame, kinta ne’e.
Fundasaun K’nua Haberan Komunidade (KHK) realiza atividade formasaun ho tema ‘Jestaun hirus, ho objetivu atu hamenus violénsia,’ durante loron-ida, ne’ebé hetan partisipasaun hosi membru grupu ortikultura hamutuk na’in-30.
Notísia relevante : KHC Viqueque fó formasaun no apoiu materiál ba grupu ortikultura 57
Xefe suku Uaitame haktuir, uluk joven sira kria grupu ba programa Governu, nune’e liuhosi fundu estimulu bele hakiak fahi, hakiak manu no seluk tan maibé agora lakon.
“Iha ha’u-nia mandatu, durante ne’e joven sira hosi suku Uaitame kria grupu no sira halo propostua ha’u rasik maka asina. Depois hetan tiha ajuda sira rasik halo lakon no agora la eziste hotu ba tiha ne’ebé ha’u la hatene. Loloos hirak ne’ebé hetan ona tulun tenke esforsu hodi moris, labele la’o iha dalan klaran mate. Ida-ne’e sai esperiénsia ba joven sira nune’e ba futuru labele akontese tan,” nia akresenta.
Biban ne’e, Xefe suku husu ba grupu ortikultura ne’ebé daudaun eziste hela iha Uaitame atu halo esforsu, badinas serbisu no labele hein apoia maka foin halo atividade.
“Ha’u agradese tebes ba ami tanba durante ne’e imi halo atividade ortikultura, maski imi la hetan apoiu ruma husi parte ONG no Governu ruma, maibé imi bele organiza malu hodi kria ortikultura ho kbiit ne’ebé imi iha,” nia tenik.
Ho ida-ne’e, líder komunitáriu ne’e prefere membru sira kria nafatin unidade iha grupu laran atu grupu ne’e eziste nafatin hodi kuda modo rai ne’ebé grupu uza ho di’ak atubele hetan osan sustenta ba moris.
Iha fatin hanesan, Koordenadór Grupu Ortikultuta, Júlio do Rosário, haktuir, grupu hahú halo atividade kuda modo iha tinan 2022 no agora kontinua halo atividade hodi fa’an ba konsumidór sira.
“Ida-ne’e ami-nia inisiativa rasik maka kuda, balun ami fa’an iha merkadu no balun ami han. Maski ami hasoru dezafiu, maibé ami esforsu-an kuda nafatin tanba parte ida ajuda ona ami,” nia realsa.
Jornalista : Vitorino Lopes da Costa
Editora : Julia Chatarina
