OÉ-CUSSE, 22 setembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, sesta ne’e inaugura projetu ponte Noetoko inklui ponte ki’ik rua iha aldeia Neofmetan, suku Ban-Afi, sub-rejiaun Nítibe hodi fasilita movimentu komunidade sira mai hosi sub-rejiaun Oésilo, Pássabe, Nítibe no Pante Makasar bele ultrapasa ba merkadu iha iha tempu udan.
Notísia relevante: Autoridade lokál nia esperansa ba futuru konstrusaun ponte Bitopa-Noetoko
Medida Ponte Noetoko ne’e ho naruk metru 84 kompleta ho moru protesaun metru 180, no ponte ki’ik rua, iha Neofmetan I metru hitu no daruak metru 18.
“Primeiru liga suku rua, Usitasa’e ho Ban-Afi, maibé ponte Noetoko ne’e, liga direita sub-rejionál rua, Nítibe ho Oésilo, maibé benefisiáriu ne’e to’o suku 18 sub-rejiaun haat tanba Pássabe Malelat bele liu ponte Noetoko no Neofmetan I no II, no hosi Pássabe atu ba Pante Makasar bele liu Ponte Noetoko, hosi ne’e mak ita hatene sub-rejionál haat bele asesu hotu” Arsénio Bano ba jornalista sira hafoin inaugura iha suku Ban-Afi.
Nia hatutan, estratéjia ne’e mai hosi Autoridade RAEOA liuhosi Diresaun Rejionál Infraestrutura, hanesan ponte Neofmetan II liga suku suku rua importante, Ban-Afi ho Lela-Ufe tanba iha kedas fronteira, maibé fasilita mós asesu ba sub-rejiaun Pássabe hosi bairru Kusi ba to’o suku Malelat.
Arsénio Paixão Bano, agradese ba Autoridade lokál sira hamutuk ho komunidade sira iha sub-rejiaun Nítibe tanba durante ezekusaun kontrui ona hodi fó susesu ba kontrusaun Ponte Noetoko to’o faze finalizasaun.
“Tan ne’e agradese ba autoridade lokál sira iha Nítibe, jestór no suku Ban-Afi tanba kooperasaun liuhosi komunidade, tanba sira-nia pasiénsia no kontribuisaun servisu ne’e la’o ho susesu to’o ohin ita inaugura,” nia orgullu.
Notísia relevante: Ponte Bitopa-Noetoko konstrui uza dezeña ponte antiga Oébaha no Bihala
Jestór sub-rejiaun Nítibe, Teodoro Sila, ho komunidade José Lalus Abi, hosi suku Ban-Afi agradese ba Governu liuhosi Autoridade RAEOA, tanba harii ponte ne’e korresponde direita preokupasaun komunidade sira iha sub-rejiaun Nítibe.
“Ha’u reprezenta komunidade suku lima no aldeia 17 iha sub-rejiaun Nítibe, ami agradese tanba desde tempu bei-ala sira to’o ohin loron foin harii ponte ida-ne’e, tan ne’e ha’u agradese wain, tanba bele fó ona asesu ba ita-nia komunidade tomak atubele hala’o sira-nia servisu, liu-liu viajen ho meiu transporte, ne’ebé dalaruma difikulta iha tempu udan,” nia orgullu.
Komunidade José Lalus Abi, hosi suku Ban-Afi, informa ponte tolu ne’e inaugura ona iha área Ban-Afi.
“Tanba dalan ne’e di’ak ona, ita la’o maske udan boot ka ki’ik, ita la’o di’ak ona, bele ba Pássabe, Nitibe no Pante Makasar sei la iha susar ona, tanba dalan di’ak ona,” nia orgullu.
Entretantu, projetu ponte Noetoko inklui ponte ki’ik rua iha aladei Neofeman konstrui hosi kompañia Lifau Indah Unipesoál Lda ho kustu $625,451.54, orsamentu ne’e Autoridade RAEOA aloka hosi Orsamentu Jerál Estadu (OJE) tinan 2022 nian.
Notísia relevvante: Autoridade RAEOA inaugura ponte Bitopa fasilita komunidade sub-rejiaun tolu
Jornalista: Abílio Elo Nini
Editór: Evaristo Soares Martins
