iklan

EKONOMIA, HEADLINE, MUNISÍPIU, OÉ-CUSSE (RAEOA)

Reabilitasaun estrada rurál hosi Pune ba Lela-Ufe atinje 60%

Reabilitasaun estrada rurál hosi Pune ba Lela-Ufe atinje 60%

Reabilitasaun estrada rurál hosi Pune ba Lela-Ufe atinje ona 60℅. Imajen Tatoli/Abílio Elo Nini.

OÉ-CUSSE, 25 setembru 2023 (TATOLI) – Progresu fíziku ba projetu reabilitasaun estrada rurál hosi merkadu Pune, suku Usitasa’e, sub-rejiaun Oésilo liga ba suku Lela-Ufe, sub-rejiaun Nítibe ho distánsia kilómetru lima resin daudaun ne’e atinje ona 60%.

Projetu reabilitasaun ne’e, Autoridade RAEOA hatuur fatuk dahuluk iha loron 28 fulan-juñu foin lalais ne’e, ne’ebe ezekuta hosi kompañia Lifau Indah Unipesoál Lda.

“Ita mós halo estrada agora nia progresu 60%, estrada ne’e hosi Pune ba Kuat-Enes Lela-Ufe, ne’ebé tinan oin ne’e, ita sei kontinua to’o Mahata, Nítibe tún ba Baoknana, tanba agora ita mós halo hosi Roti, suku Cunha mai Nunuheno sa’e bas uku Taiboko atu hasoru Lela-Ufe Nítibe,” Prezidente Autoridade RAEOA, Arsénio Paixão Bano, ba jornalista sira hafoin halo fiskalizasaun iha suku Lela-Ufe, Oé-Cusse, sábadu ne’e.

“Tanba ita-nia hakarak Oé-Cusse ne’e,  prioridade infraestrutura ba asesu komunidade ba suku hotu-hotu bele la’o, tán ne’e maka ita servisu barak, iha infraestrutura, ponte no estrada, bee-moos no eletrisidade,” nia katak.

Notísia relevante: RAEOA aloka millaun $1-resin manutensaun estrada no ponte sub-rejiaun tolu

Diretór kompañia Lifau Indah Unipesoál Lda, Fernando Mak, espera Autoridade bele aprosima komunidade afetadu sira, nune’e bele kontribui iha prosesu ezekusaun, tanba durante ne’e kompañia enfrenta problema ho komunidade balu seidauk oferese rai hodi haluan estrada.

“Estrada hosi Pune ba to’o Lela-Ufe ne’e, nia progresu to’o agora ne’e 60%, pursentu ne’e ita halo ona ba trevel ne’e 100% ona, ita tama fali ba servisu seluk maibé nia metade liu ona, bainhira remata ita komesa tama ba plan, servisu fíziku ikus últimu nian tanba sei nahe simentu,” nia hateten.

Diretór kompañia Lifau Indah, hateten,  durante ezekusaun, parte kompañia enfrenta problema tanba iha komunidade balu seidauk oferese rai, nune’e difikulta projetu la’o tarde uitoan.

“Ami hetan difikuldade hosi komunidade balu la koopera hodi oferese rai, tanba estrada ne’e presiza halo luan, maibé ami kompañia labele obriga sira, tanba ne’e sira-nia direitu, ami halo de’it ida-ne’ebé mak bele halo, ita-nia kontratu tempu tinan ida, maibé ha’u sente lato’o tinan ami bele konklui ona tanba nia distánsia ne’e kilómetru lima resin,” nia promete.

Entretantu, kompaña Lifau Indah Unipesoál Lda, reabilita hosi suku Usitasa’e sub-rejiaun Oésilo to’o suku Lela-Ufe, sub-rejiaun Nítibe ho distánsia (STA 0+000-STA 5+500) ho valór kontratu $735,776.66 ho durasaun servisu tinan ida.

Notísia relevante: Kompañia Am-Lhichoe reabilita estrada rurál Pássabe to’o ona 10%

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!