KBRI sensibiliza programa bolsa estudu ba estudante finalista iha Covalima
COVALIMA, 26 setembru 2023 (TATOLI)–Embaixada Indonézia ka Kedutaan Besar Republik Indonesia (KBRI) iha Timor-Leste (KBI), tersa ne’e, hala’o sensibilizasaun programa bolsa estudu ba estudante finalista nivél sekundáriu iha Covalima.
“Ami mai iha ne’e atu hala’o sensibilizasaun programa estudante ne’ebé atu asesu bolsa estudu iha universidade Indonézia ba estudante finalista nivél ensinu sekundáriu iha Covalima,” Adidu Edukasaun Embaixada Indonézia iha Timor-Leste, Ikhfan Haris, hateten ba jornalista sira iha salaun Eskola Sekundária Jerál Públiku (ESGP, sigla portugés) Suai, tersa ne’e,
Programa sensibilizasaun ne’e hala’o tanba informasaun kona-ba programa bolsa estudu hosi Indonézia ne’e iha universidade 43 mak atu simu estudante timoroan ne’ebé akaba ona ensinu sekundáriu iha Timor-Leste.
Tanba, nia hateten, iha tinan 2022 ne’e iha estudante timoroan na’in-352 mak asesu bolsa estudu iha Indonézia ne’ebé entre estudante hirak ne’e envolve (inklui) mós estudante balun hosi Covalima.
Programa sensiblizasaun informasaun ne’e ho intensaun atu aumenta númeru estudante ne’ebé atu asesu bolsa estudu iha universidade 43 iha Indonézia.
“Ami mai iha eskola sekundária ho númeru estudante ne’ebé boot, estudante finaliza ne’ebé ho valór boot, iha oportunidade atu asesu bolsa estudu iha Indonézia, iha tinan oin ba estudante ne’ebé mak finaliza ona nia estudu iha eskola sekundária,” nia dehan.
Tuir planu, hahú iha loron 24 -26 outubru 2023, sei loke feira ne’ebé universidade 43 prepara, no ba estudante ne’ebé atu asesu bolsa estudu hodi hala’o rejistu no fó teste, liuliu oportunidade ne’e loke ba estudante ensinu sekundáriu ne’ebé ramata nia estudu iha tinan 2022 no tinan 2023.
“Ami espera fó oportunidade ba estudante finalista hosi munisípiu Covalima. Tanba, ami labele ba iha munisípiu hotu maibé ami foin ba iha RAEOA, Bobonaro, Manatuto, Manufahi, Baucau no Covalima,” nia hateten.
Tuir dadus ne’ebé KBRI fó sai katak estudante ne’ebé oras ne’e daudaun tuir formasaun iha KBRI Timor-Leste hamutuk na’in-300, no hein atu ba estuda iha Indonézia no iha fulan oin sei fó oportunidade ba estudante na’in-150.
Aleinde hala’o sensibilizasuan KBRI mós fó formasaun ba profesór no profesora sira-ne’ebé hanorin dixiplina malaiu hodi hasa’e profesór sira nia koñesementu.
“Ami hosi KBRI ami iha programa atu fó formasaun ba profesór lian maláiu iha Timor-Leste. Ami mai iha Covalima atu hasa’e profesór sira-nia koñesementu oinsá bele hanorin ho di’ak,” nia hateten.
Diretór Interinu Eskola Sekundáriu Jerál Públiku Suai, Abel Sarmento, reforsa husu estudante finalista sira atu estuda makaas iha ezame nasionál bele hetan valór di’ak, nune’e bele asesu bolsa estudu ba eskola iha universidade sira iha Indonezia.
“Ita-boot sira ramata iha ensinu sekundáriu atu kontinua iha universidade maibé ba estudante finalista ne’ebé mak iha valór di’ak hodi bele asesu bolsa estudu, nune’e ita-boot sira tenke estuda, nune’e bele iha oportunidade asesu bolsa estudu,” nia dehan.
Jornalista : Celestina Teles
Editór : Cancio Ximenes
