SEAK halo konkursu literásia dada foinsa’e nia interrese atu lee
DILI, 27 setembru 2023 (TATOLI)—Sekretáriu Estadu Arte no Kultura (SEAK), kuarta ne’e, halo kompetisaun literásia ho tema “Papel Foinsa’e iha Mundu Liteásia iha Timor-Leste” ne’ebé foka liubá estudante ensinu sekundáriu hodi dezenvolve joven sira-nia interrese atu lee.
Diretor Jerál Arte no Kultura, Manuel Ximenes Smith, hateten objetivu konkursu literásia ba ema joven sira atu aumenta koñesimentu no abilidade literásia entre jerasaun foinsa’e nian.
“Liuhosi konkursu ida-ne’e, sira bele habelar sira-nia koñesimentu iha tipu oioin hadi’a sira-nia abilidade komunikasaun no aumenta sira-nia kompreensaun kona-ba mundu oioin ho sira-nia laran. Objetivu prinsipál ba konkursu literasia ba ema joven nian mak atu hasoru sira-nia interrese iha leitura no hakerek,” Manuel Ximenes Smith hateten ba jornalista sira, iha Centro Nacional Chega!, Institutu Públiku, (CNC, I.P) iha antigu Komarka Balide, kuarta-ne’e.
Tuir nia, konkursu literásia fó oportunidade ba joven sira hodi kria abilidade ba leitura, hakerek no matenek ho pensamentu krítiku.
Diretór Nasionál Biblioteka no Muzeu, João Fatima da Cruz Sousa, hateten atividade ne’e realiza iha kada tinan no foku atu promove biblioteka no kultura leitura entre joven sira.
“Tinan ida-ne’e ita halo iha Dili, no loos ne’e iha halo iha eskola téknika no públiku 18 ho estudante hamutuk na’in-38 maibé eskola ualu de’it mak tuir kompetisaun ho estudante feto no mane hamutuk na’in-16 ne’ebe elizivel ba konkursu ida-ne’e,” João Fatima da Cruz Sousa dehan.
Nia hatutan, partisipante sira sei simu sertifikadu no hadi’a osan iha diferensa montante nominál ho fundu ba kompetisaun ne’e ho valór $7,500.
Reprezentante estudante hosi Eskola Sekundária São Pedro Comoro (SMA), Arnaldo Horta, hato’o agradesimentu ba Sekretária Estadu Arte no Kultura (SEAK) tanba halo konkursu ida-ne’e no fó oportunidade ba sira hodi kompete.
Jornalista : Osória Marques
Editór : Cancio Ximenes
