CAILACO, 29 setembru 2023 (TATOLI)- Governu liuhosi Ministru Asuntu Kombatente Libertasaun Nasionál, sei hola medida polítika kona-bá prosesu rekolla no haloot restu mortál iha territóriu nasionál hodi dignifika sira-nia sakrifísiu iha prosesu luta ba libertasaun nasionál.
Sekretáriu Estadu Veteranu, Cesar dos Santos da Silva ‘Merak’ fó-sai katak, razaun IX Governu muda polítika kona-ba rekolla restu mortál ne’e hahú hosi IV Governu Konstitusionál to’o VIII Governu hasoru problema barak.
Razaun seluk ne’ebé IX Governu hakarak muda polítika ne’e tanba foin lalais iha serimonia funerál ba restu mortál ikus iha Laga, Baucau, identifika iha urna laran kuaze 100-resin falun ho bandeira RDTL maibé reprezenta de’it fatuk no rai.
“Ita ba haree balun ruin laiha, ita tenke tau fatuk ho rai, tanba ita-nia kultura dehan tenke halo ida-ne’e. Ita haree katak ne’e kultura, maibé politikamente ne’e ladún di’ak, gastu ne’e sempre boot nafatin, depois ita ko’alia dehan reconhecer e valorizar, ita atu valoriza oinsá, pelumenus ema nia ruin iha ba, la’ós ita foti fatuk ida mak hakerek António no Maria. Ne’e la justu, ladún di’ak,” Merak ko’alia asuntu ne’e iha Manu-Kaitete, suku Manapa, Cailaco, sesta ne’e.
Veteranu ne’e hatutan, polítika IX Governu atu hatuur prosesu hotu iha fatin ne’ebé loloos hodi dignifika eroi pátria sira-ne’ebé sakrifika sira-nia vida tomak luta ba libertasaun nasionál.
“Ita hakarak rekoñese João, joão duni, se Maria, Maria duni, la’ós fatuk ida ita temi Maria, rai ida ita temi João ne’e, ita-boot sira hanoin bele ka lae, ne’e ita hanesan la fó sentidu, ba labarik sira aban bainrua moris, boot sira hatene agora dehan, ne’e la’ós ruin, fatuk ho rai mak iha, entaun sira ladún fó importánsia, maibé kuandu dehan ruin, sira sei respeita, hanai no valoriza,” Sekretáriu Estadu Veteranu ne’e subliña.
Nune’e Merak husu ba Konselu Kombatente Munisipál sira atu identifika loloos restu mortál sira-ne’ebé rekolla ona.
“Imi haree kuandu iha dadus katak, iha mate ruin, imi husu loos sira, imi haree ho matan ruin iha ka lae, se mate fatin mak ne’e imi ba husu ema ida hakoi ne’e sei moris ka lae, atu nia mai hatete, ita ke’e mós hetan nia ruin, la’ós ita ke’e ba tau fatuk ho rai, ne’e labele,” Merak afirma.
Sekretáriu Estadu Veteranu ne’e dehan, bainhira kria ona polítika ne’e, Governu sei sosializa hodi konvense ema hotu, atubele redús gastu hosi orsamentu jerál Estadu.
Notísia relevante: 2024, Governu planea haloot restu mortál iha munisípiu tolu
Jornalista: Sérgio da Cruz
Editór: Evaristo Soares Martins
