DILI, 02 outubru 2023 (TATOLI) – Ministériu Juventude, Desportu Arte no Kultura (MJDAK) hapara ona empreza Uka Unipesoáł Lda ne’ebé konstrui kampu multifunsaun iha Taibessi tanba la iha kapasidade hodi ezekuta obra ne’e.
“Kampu Taibessi la’ós ha’u-nia tempu maibé iha Governu anteriór mak fó ba kompaña ida kaer projetu ne’e. Bainhira kaer projetu ne’e, nia andamentu la la’o tanba problema iha kompaña; la iha kapasidade atu ezekuta obra ne’e, ho nune’e mak ha’u rasik mak kansela ona ba projetu ne’e”, Ministru MJDAK, Nélio Isaac Sarmento, ba jornalista sira iha Palásiu Governu, segunda ne’e.
Ezekutivu ne’e dehan, projetu ne’e pendente ona no hein Governu loke fali konkursu hafoin kontinua fali.
“Projetu kampu Taibessi iha tinan ida-ne’e ita seidauk bele loke fali tenderizasaun (konkursu públiku), maibé ita tau ba orsamenta tinan 2024 nian”, nia adianta.
Rekorda fali katak konstrusaun ba kampu ne’e SEJD lansa fatuk dahuluk iha loron 22 outubru tinan rua kotuk no agora kompleta ona tinan rua seidauk finaliza, tanba tuir kontratu sei finaliza iha abril 2022, maibé la konsege.
Ho nune’e, Governu liuhosi SEJD kontinua hanaruk tan kontratu fulan neen tan atu bele konklui projetu ne’e.
Konstrusaun kampu multifunsaun ho objetivu atu joven-sira bele espresa talentu no prátika desportu hanesan futeból, basketból no voleiból.
Projetu ne’e ezekuta hosi kompañia Uka Unipesoáł Lda ho orsamentu $24000-resin no durasaun fulan-neen.
Maske nune’e Governu konsege selu ona 20% ba empreza ne’e tanba halo ona servisu balun.
Jornalista: Hortencio Sanchez
Editór : Zezito Silva
