SEI no parseiru diskute validasaun Planu Estratéjiku SEI 2023

DILI, 05 outubru 2023 (TATOLI)–Sekretáriu Estadu Igualdade (SEI), kuarta ne’e, ho parseiru sira diskute validasaun Planu Estratéjiku SEI 2023 nian iha City8, Maneleuana, Dili.
Sekretária Estadu Igualdade (SEI), Elvina Sousa Carvalho, diskusaun ne’e hala’o bazeia ba Dekretu-Lei Númeru 74/2023, 14 setembru, kona-ba orgánika SEI nian define nia knaar no poder atu promove igualdade iha lei, politika públiku, planu estratéjiku no operasionál sira, programa Governu no orsamentu Estadu hodi promove igualdade jéneru no inkluzaun.
Iha lei ne’e mós ko’alia kona-ba hasa’e koñesementu públiku nian atu elimina diskriminasaun, prevene no kombate violénsia hasoru feto no labarik feto sira no mós promove feto iha vida sosiu ekonómika, polítika no pozisaun foti desizaun.
“Objetivu planu etratéjiku atu koñese didi’ak ita-nia papél no saida mak ita hakarak hala’o iha tinan lima mai, halo aliñamentu ba ita-nia kolaborasaun, dirasaun no prioridade sira ba ita-nia asaun no advokásia dokumentu ne’ebé válidu, no vivo ida-ne’ebé bele sai referénsia no matadalan ba planeamentu no orsamentasaun SEI nian iha mandatu governasaun ida-ne’e,” Elvina Sousa Carvalho hateten ba jornalista sira hafoin halo abertura ba kolókiu kona-ba validasaun ba planu estratéjiku SEI nian ba tinan 2023-2028, iha City8, Manleuana, Has-Laran.
Dokumentu ne’e mós bele ajusta no halo mudansa tuir aspirasaun no prioridade dezenvolvimentu nasionál no tuir tendénsia ka dirasaun ne’ebé sei mosu iha setór igualdade jéneru, no hakbiit feto iha tinan lima nia laran ne’e.
Sekretáriu Estadu halo kolókiu ba validasaun Planu Estratéjiku SEI 2023 nian, tanba importante tebes no nesesáriu duni atu iha planu estratéjiku ida-ne’ebé kolókiu ohin ne’e bolu parseiru internasionál sira no sosiedade sivil, nune’e bele entende misaun no vizaun sira SEI nian.
Liuhosi planu estratéjiku, tuir nia, mak bele aliñamentu ho nia atividede sira hodi bele atinje nia objetivu ne’ebé mak iha no sai sosiedade ne’ebé justu no iguál, tanba ne’e mak kolókiu ne’e importante tebes atu valida, nune’e iha parseiru balun hakarak apoiu karik haree ba planu SEI nian ne’e.
Prezidente Institutu Nasionál Defeza Direitu Labarik (INDDICA, sigla portugés), Dinorah Granadeiro, hateten planu estratéjiku ne’e importante ba INDDICA tanba iha ligasaun servisu ho SEII ba feto.
“Planu estratéjiku ne’e importante tanba sai giaun ida ba SEI hodi bele halo nia servisu ho mellora liután no oinsá mak bele hasa’e promosaun igualdade. Ida-ne’e oinsá bele fó espasu ba ita-nia sidadaun hotu iha Timor hodi goza duni igualdade. Ba ami INDDICA importante tanba iha ligasaun servisu no pertenente tebes tanba SEI halo promosaun ba igualdade ba feto, signifika hosi feto labarik to’o adultu,” nia dehan.
Prezidente Asosiasaun Feto Munisípiu Dili, Maria Fátima Amorin Pereira, hateten planu estratéjiku SEI nian ne’e atu haforsa kna’ ar feto nian.
“Tuir ami-nia prespetiva ba Planu Estratéjiku Nasionál SEI nian ba tinan 2023-2028 importante no interresante duni, atu haforsa kna’ar feto sira-nian ne’ebé iha, tanba ami ne’e tutela ba iha instituisaun ne’ebé mak liga ba igualdade nian,” nia hateten.
Jornalista : Osória Marques
Editór : Cancio Ximenes

