DILI, 11 outubru 2023 (TATOLI) –Programa Together for Equality (T4E) ka Hamutuk ba Igualdade ne’ebé implementa iha munisípiu Dili, Baucau, Covalima, no Rejiaun Administrativa Espesiál Oé-Cusse Ambeno (RAEOA) benefísia ona ema rihun 54-resin.
Projetu ne’e atinje, to’o setembru tinan ne’e, milestone ida hodi fó impaktu pozitivu ba benefisiáriu diretu sira – feto 31.659, mane 22.668, membru LGBTI sanulu no ema ho defisiénsia 83. Projetu ne’e mós fó apoiu ba instituisaun Governu 18 no organizasaun sosiedade sivíl 29.
Programa Together for Equity ne’e finansia husi Ajénsi Kooperasaun Internasionál Koreia Súl (KOICA) ho orsamentu hamutuk millaun $10 no nia implementasaun durante tinan haat nia laran, entre novembru 2020 no 2024.
T4E nu’udar programa ida ne’ebé komprensivu ho objetivu atu prevene no responde ba violénsia bazeia ba jéneru no promove igualdade iha Timor-Leste.
Tuir komunikadu husi KOICA, haree ba implementasaun programa ne’e mak parseiru sira fahe esperiénsia kona-ba progresu serbisu sira.
“Progresu sira ne’ebé mak ami halo ona durante tinan tolu mak pilár dahuluk ko’alia kona-ba prevensaun nian mak ita konsege halo intervensaun ba área edukasaun nian mak ita tama tiha ona ba UNTL hodi kria programa ida hanaran kampus seguru ba estudante no dosen sira”, dehan.
Estabelese mós fatin seguru ida bainhira akontese kazu bele halo atendimentu psikolojia nian. “Ida ne’e hanesan ezemplu ida ba área prevensaun nian, maibé prevensaun ida-ne’e ita halo to’o iha merkadu Baucau hodi dook hosi violénsia sira”, esplika.
Ba área saúde nian, tuir nota esplika, konsege estabelese fatin seguru no fó treinamentu ba parteira no enfemeira sira, nune’e bele fó atendementu ba pasiente ne’ebé mai ho moras no vítima ne’ebé presiza treinamentu másimu.
Eventu ne’e ninia objetivu mak atu hatudu intervensaun T4E nian ne’ebé hala’o to’o ohin loron, diskute lisaun sira ne’ebé aprende ona, identifika aprosimasaun sira ne’ebé susesu no dezenvolve estratéjia sustentabilidade ida tanba projetu ne’e besik ona atu taka iha novembru 2024.
Partisipante sira iha atividade ne’e mak Koordenadora Rezidente ONU, Funmi Balogun, Diretora Nasionál KOICA Timor-Leste, Euju Cha, Diretora-Jerál Sekretaria Estadu Igualdade (SEI), Armando da Costa, membru komisaun konjunta, reprezentante sira husi liña ministeriál no parseiru dezenvolvimentu sira.
Jornalista: Osória Marques
Editora: Maria Auxiliadora
