BALI, 12 outubru 2023 (TATOLI)—Primeiru-Ministru, Kay Rala Xanana Gusmão, hateten, Governu planeia ona atu destaka pesoál hanesan Polísia Komunitária hodi kontrola populasaun ne’ebé soe lixu arbiru.
Inisiativa ne’e tanba Governu nota ikus ne’e apelu ne’ebé autoridade halo hodi husu populasaun labele soe lixu arbiru la fó impaktu, tanba populasaun nafatin laiha konsiénsia soe lixu la’ós iha fatin lixu ne’ebé prepara ona.
“Agora iha ona programa Governu atu hahú ho ida-ne’e hodi kria grupu ida ka rua ne’ebe loron-loron ba hamoos tasi ibun no kria mós Polísia Komunitária, katak sé mak soe lixu arbiru, liu-liu iha tasi ibun sira tenke kaer,” Xefe Governu hateten hafoin partisipa reuniaun nível a’as kona-ba Arkipelájiku ka Archipelagic and Island States Forum (AIS Forum), iha Bali-Indonézia, kinta ne’e.
Notísia relevante : Konstrusaun fatin atu hatuur kontentór lixu besik ramata
Nia haktuir, antes ne’e IV Governu deside kada sabádu halo limpeza hodi hamoos tasi ibun sira, maibé hafoin ida-ne’e programa ne’e laiha.
“Loron hirak liubá, ha’u haruka labarik sira hamoos bee-dalan iha área balun iha Dili laran, IX Governu sei kontrata empreza balun ne’ebé la’ós atu hamoos sidade Dili maibé atu haree de’it ba hamoos plástiku tanba plástiku maka sai problema boot ida ba tasi-laran no ba ikan sira-nia vida, liu-liu ikan boot sira, tanba sira ninia ibun boot entaun plástiku sira namlele iha tasi laran sira tolan. Ida-ne’e lori risku ba ikan ne’ebé nu’udar mós ita-nia rikusoin,” nia akresenta.
Xanana apela ba populasaun atu labele soe fier arbiru, liu-liu iha área tasi ibun sira tenke moos tanba lixu bele estraga biodiversidade.
Jornalista : Antónia Gusmão
Editora : Julia Chatarina
