“Ha’u prontu kompete ho mane tanba feto xave importante ba nasaun”
DILI, 13 outubru 2023 (TATOLI)–Kandidatura xefe suku iha territóriu, sesta (13 outubru 2023) ohin, ida-idak aprezenta lista ba meza asembleia suku no aldeia hodi hein prosesu verifikasaun lista kandidatura nian, sé mak merese sai kandidatu no sé mak sei esklui.
Notísia Relevante: Asembleia suku no aldeia tenke serbisu ho imparsiál iha prosesu verifikasaun lista
Maske seidauk halo verifikasaun maibé kandidatura feto ba xefe suku Caicoli, Senhorinha Costa Seixas, hateten iha eleisaun suku ne’ebé tuir planu sei realiza iha 28 outubru ne’e, nia parte mós pronto atu kompete ho kandidatura mane na’in-haat iha suku Caicoli, postu administrativu Nain Feto, munisípiu Dili.
“Ha’u kandidatu ba xefe suku iha periódu ida-ne’e, tanba ha’u lakohi lakon no pronto atu kompete ho mane sira. Ha’u-nia feto maluk barak motiva no fó korajen katak feto ne’e sai inan ba nasaun. Feto mós sai xave importante ba família no ba nasaun inklui sai instrumentu ba nasaun. Ida-ne’e mak motiva tebes ha’u, hodi ha’u kompete iha eleisaun suku tinan ne’e,” Senhorinha Costa dehan ba jornalista sira hafoin aprezenta dokumentu ba meza asembleia suku iha sede suku Caicoli, sesta ne’e.
Senhorinha Costa hato’o nia vizaun no misaun katak atu determina tempu ho situasaun ne’ebé mak di’ak ba komunidade importante hamutuk ho Estadu hodi hadi’a povu nia moris.
Bainhira hetan fiar hosi povu mak nia parte sai hanesan liman-ain povu nian hodi hatutan preokupasaun povu nia ba Governu, nune’e bele halo dezenvolvimentu iha suku laran.
“Ba ha’u manán ka lakon la’ós kestaun, maibé hanesan feto hakarak kompete ho mane no lori besik dezenvolvimentu ba povu,” nia hateten.
Nia kompete ho mane iha eleisaun suku períodu ne’e ema na’in-lima ne’ebé kompostu hosi feto ida (1) ho mane na’in-haat (4) inklui xefe suku tuan mós rekandidata-aan.
Atuál xefe suku Caicoli, Hipolito Marques, hateten povu Caicoli nafatin fó konfiansa ba nia hodi kompete iha eleisaun suku tinan ne’e, nune’e bele kontinua implementa programa no planu Governu nian.
“Ha’u rekandidata-aan fali tanba ha’u nafatin hetan fiar hosi komunidade Caicoli. Entaun, ohin, ha’u mai aprezenta dokumentu ba meza asembleia. Dokomentu ne’ebé ohin ha’u entrega mak akta, eleitorál, foto depois lista apoiante kuaze 1.000,” nia hateten.
Bainhira eleitu hiukas sai xefe suku mak nia sei implementa no hala’o servisu Estadu nian, tanba Estadu dehan halo projetu ida-ne’e entaun xefe suku prontu halo tanba uza Estadu nia osan.
Daudaun ne’e, populasaun iha suku Caicoli hamutuk 6.000, ho xefe família hamutuk 999 maibé votante hamutuk 3.385.
Pesoál Sekretariádu Tékniku Administrasaun Eleitorál (STAE) Apoiu Suku Caicoli, Elias de Deus, hateten durante akompaña prosesu ne’e hotu iha feto potensiál ida mak kompete ho mane sira.
“Ohin, ami akompaña aprezentasaun dokumentu kandidatura nian mai haree iha duni igualdade tanba iha mós feto potensiál ida mak compete. Maibé, horisehik ami rona dehan feto rua, depois ikus deside apoiu de’it nia feto maluk entaun ohin ida de’it. Agora ne’e, ami seidauk bele fó sai lista kandidatura ne’ebé liu kritéiru,” nia hateten.
Apoiu Sekretáriadu Tékniku Administrasaun Estatál (STAE) iha suku ne’e, nia dehan, atu haree no akompaña de’it no prosesu tomak ne’e asembleia suku mak hatene tanba sira mak na’in ba prosesu eleisaun ne’e.
“Ami hein iha ne’e hodi akompaña sira no kandidatura ne’ebé mak liu no ami sei foti sira-nia fotografia tahan ida hodi prodús buletin votu,” nia dehan.
Notísia Relevante: Eleisaun suku: Meza eleitorál suku simu kandidatura iha 13 outubru
Jornalista : Osória Marques
Editór : Cancio Ximenes
