DILI, 13 outubru 2023 (TATOLI)–Diretór Operasionál no Manutensaun Bee Timor-Leste, Empreza Públiku (BTL, E.P), Aleixo dos Santos, hateten tékniku BTL, E.P halo levantamentu dadus ba mákina bomba bee ne’ebé avaria hodi fornese bee ba abitante no negosiante sira iha merkadu Taibesi.
Nia hatutan, ida-ne’e ho objetivu atu responde ba preukupasaun vendedór sira iha merkadu tamba loro-loron sira sosa bee-moos atu hala’o sira-nia atividade negósiu no balun sira uza ba hodi tein no balun uza ba haris fatin.
“Ita-nia ekipa tékniku foin lalais halo ona levantamentu dadus, sira hateten sistema mákina bomba bee blokeia tiha. Rezultadu levantamentu dadus ne’e ami aprezenta ba Autoridade Munisipál, tanba sistema integradu hamutuk ho jestaun merkadu, entaun autoridade munisipiu mak jere,” Diretór ne’e hateten ba Agência Tatoli iha Caicoli, sesta ne’e.
Bainhira mákina bomba bee nian ne’e aat, nia dehan, jestaun merkadu Taibesi aprezenta pedidu ida ba iha BTL, E.P atu halo verifikasaun.
“Tékniku rua mak ba verifika ona no levantementu dadus, maibé atu hasa’e no hadi’a bomba presiza ekipa hotu. Presiza ema na’in-10 ka mínimu na’in-ualu (8) atu hasae no hatun bomba bee nian,” nia hateten.
Trsamentu atu hadi’a mákina bomba bee nian ne’e, Autoridade Munisípiu Díli (AMD) nia responsabilidade, entaun BTL. E.P rekomenda de’it atu hola materiál tanba BTL, E.P ne’e fó de’it apoiu tékniku.
Tanba ne’e, nia apela ba jestór merkadu Taibesi atu kontrola bee merkadu nian no konsumidór sira tenke kuidadu, tanba prefurasaun bee ne’ebé ne’e uza enerjia eletrisidade.
Jornalista : Jesuína Xavier
Editór : Cancio Ximenes
