VIQUEQUE, 17 outubru 2023 (TATOLI)—Polísia Nasionál Timor-Leste (PNTL) liuhosi Departementu Investigasaun Kriminál rejista kazu tráfiku umanu hamutuk 64 iha fulan-janeiru to’o outubru.
Xefe Departamentu Investigasaun Kriminál PNTL, Superentendente, João Belos dos Reis, hateten, Departamentu Investigasaun Kriminál rejista kazu ho vítima timor-oan sira iha nasaun Malázia, Alemaña, no Polándia, ne’ebé daudaun sei kontinua halo prosesu identifikasaun.
“Departamentu Investigasaun Kriminál rejista kazu sira-ne’e maioria akontese iha rai-li’ur. Ami kontinua halo prosesu identifikasaun no fó apoia vítima sira atu lori fila mai Timor-Leste. Ida-ne’e maka daudaun ami esforsu hela,” Superentendente João Belos, informa ba Agência Tatoli, hafoin ramata disaminasaun tráfiku umanu ba estudante sira iha administrasaun munisípiu Viqueque, tersa ne’e.
Notísia relevante : IOM apoia Governu liuhosi área jestaun fronteira-tráfiku umanu-mobilidade laborál
Departementu Investigasaun Kriminál kontinua rejista kazu sira ne’ebé konsidera tráfiku umanu iha tinan ne’e nia laran, nune’e iha indikasaun forte bele buka dadus no faktu sira hodi prosesa. Kazu tráfiku umanu seluk mak hanesan ema estranjeru tama mai rai-laran.
Aleinde ne’e, Komisaun Anti Tráfiku Umanu daudaun ne’e serbisu maka’as ba kazu tráfiku umanu no PNTL mós kontinua halo identifikasaun ba suspeitu sira.
“Ami deteta suspeitu hamutuk na’in-haat maka envolve tráfiku umanu, daudaun ne’e prosesa ona iha Tribunál no suspeitu sira ne’ebé iha estranjeru ami tenta serbisu hamutuk ho nasaun sira atu deporta sira mai Timor-Leste,” nia tenik.
Medida prevensaun ba kazu tráfiku umanu maka kria disaminasaun, kontrola liña fronteira aérea, marrítima no terrestre hodi deteta movimentu vítima tráfiku umanu sira-ne’ebé iha poténsia akontese iha Timor-Leste.
“Halo prevensaun tráfiku umanu la’ós PNTL serbisu mesak, maibé serbisu hamutuk liña ministériu hotu atu ita-nia ema labele sai vítima ba tráfiku umanu. Karik ita-nia ema atu serbisu iha rai-li’ur tenke liuhosi dalan loos, liuhosi Governu no ajénsia sira-ne’ebé Governu autoriza,” nia salienta
Jornalista : Vitorino Lopes da Costa
Editora : Julia Chatarina
