Feto iha territóriu nasionál hamutuk 241 kandidata-aan ba xefe suku
DILI, 18 outubru 2023 (TATOLI)—Sekretária Estadu ba Igualdade (SEI), Elvina Sousa Carvalho, hateten feto iha territóriu nasionál hamutuk 241 mak kandidata-aan sai xefe suku hodi kompete iha eleisaun suku iha 28 outubru 2023.
Notísia Relevante: Kandidatu xefe suku iha territóriu nasionál hamutuk 2.117
“Dadus ne’ebé mak verifikadu ba totál feto kandidata-aan ba eleisaun komunitária no hakarak sai lideransa suku hamutukl 241 ho ekivalente ba 11%. Ida-ne’e hatudu katak feto iha interrese atu sai lideransa lokál,” Elvina Sousa Carvalho hateten ba jornalsita sira iha iha Palásiu Governu, kuarta ne’e.
Kona-ba feto delegada no aldeia nian, nia dehan, lei garante ona feto iha maibé importante mak prosesu ba selesaun ba feto maluk mak tenke iha poténsia duni iha estrutura suku, tanba papel hotu-hotu importante iha konsellu suku nian.
“Importante mak foti desizaun ba dezenvolvimentu iha suku laran no mós solusaun ba problema sosiál no tenke pro-ativa iha suku. Ida-ne’e importante mak halo selesaun ba poténsia,” nia dehan.
Nia hateten, misaun SEI nian mak empodera feto atu prepara-aan ba kandidata-aan no prepara-aan hakat ba kualker pozisaun.
“Ita iha fundu hodi halo atividade formasaun atu fó kapasitasaun no halo akompañamentu ba prosesu eleitorál. Dezde inisiu, ha’u dehan sei iha númeru feto ne’ebé kandidata-aan no númeru feto ne’ebé hetan konfiansa, tanba iha ona prova katak feto ne’ebé durante ne’e lidera iha suku ne’e halo sira-nai servisu ho di’ak tebes. Ida-ne’e governante dehan sei inspira fali feto seluk hodi kompete ba eleisaun komunitária ne’e,” nia hateten.
Membru Governu ne’e hateten, fundu ne’e sei apoiu liuhosi asosiasaun feto sira iha munisípiu sira no sosiedade sivil sira.
“Entre rihun $5 kada munisípiu no depende ba kuantidade suku no mós sosiedade sivil sira kuaze rihun $22,” nia dehan.
SEI halo komparasaun eleisaun suku ne’ebé mak realiza dala tolu ona hahú tinan 2004 ho feto na’in-hitu (7), 2009 númeru feto sa’e ba na’in-11 no 2016 feto aumenta ba na’in-21, no hosi tinan 2016 nian ne’e totál suku 452 no xefe suku feto iha 21 no ba aldeia 2.233 ne’e ho xefe aldeia feto hamutuk 94.
Jornalista : Osória Marques
Editór : Cancio Ximenes
