DILI, 19 outubru 2023 (TATOLI)—Institutu Nasionál Estatístika Timor-Leste, Institutu Públiku (INETL, I.P) adia peskiza kondisaun kiak iha Timor-Leste ba tinan 2024.
“INETL planeia halo peskiza ba kiak iha Timor iha tinan 2023 tuir Planu Estratéjiku ne’ebé mak iha, maibé ho mudansa Governu, entaun peskiza ba dadus kiak adia ba tinan 2024,” Prezidente Institutu, Elias Fereira, hateten bainhira partisipa atividade konsultasaun nasionál ne’ebé realiza iha salaun Nobre, Ministériu Negósiu Estranjeiru no Kooperasaun, Praia dos Coqueiros, tersa ne’e.
Daudaun Governu utiliza hela dadus kiak ne’ebé antes ne’e halo peskiza iha tinan 2014, ho rezultadu peskiza populasaun Timor-Leste 41,8%.
“To’o mai agora seidauk iha dadus kiak iha Timor. Ne’ebé sei realiza iha tinan oin tanba ami preparadu ona. INETL mós halo ona peskiza pilotu ba kiak dala-rua no iha abríl 2024 halo peskiza, no iha tinan 2024 nia rohan bele hetan ona dadus foun ba kiak iha ita-nia rain”, nia tenik.
Notísia relevante : INETL planeia halo peskiza kiak iha Timor-Leste
INETL agora utiliza ona telemóvel ho sistema operasaun android atu halo serbisu lais liu hodi hatene loloos kiak iha Timor-Leste, nune’e fó ba polítiku na’in sira hodi halo planu ba bein estar povu.
Nune’e, Governu iha tinan 2023 ne’e lansa ona relatóriu forsa traballu, ne’ebé INETL hamutuk ho parseiru sira halo peskiza iha tinan 2021.
Relatóriu ne’e hatudu katak taxa dezempregu 5,7% maibé iha sensu populasaun 2022 ne’e sei fó sai taxa dezempregu tanba relatóriu sensu populasaun 2022 sei lansa ofisiál iha maiu tinan ne’e.
Jornalista : Antónia Gusmão
Editora : Julia Chatarina
