SEAK sei prevee osan iha OJE 2024 konstrui uma tipikál Leziaval
DILI, 18 outubru 2023 (TATOLI)—Sekretáriu Estadu Arte no Kultura (SEAK), Jorge Soares Cristóvão, hateten Governu liuhosi SEAK sei prevee osan iha Orsamenu Jerál Estadu (OJE) 2024 atu konstrui fali uma tipikál Leziaval iha Lautém ne’ebé ahi han iha sábadu (11 Dezembru 2021).
Notísia Relevante: Konstrusaun uma tipikál Lautém sei lansa iha agostu-setembru tinan ne’e
“Ida-ne’e ami hasoru malu ho komisaun G ne’ebé mak vizita iha ha’u-nia fatin, ha’u hateten programa ami-nia ba sira inklui mós ida-ne’e iha orsamentu 2024 nian, ita hatene uma adat Leziaval ne’e no ami iha espasu ida ne’ebá ne’ebé iha mós sentru kulturál. Ne’ebé, mak ami sei halo reablitasaun ba sentru kulturál inklui mós konstrui fila-fali uma lisan Leziaval nian,” Governante hateten ba jornalista sira hafoin halo abertura ba atividade forum tais 2023, hodi hakbiit feto iha soru tais, iha Sentru Formasaun João Paulo II, Comoro, Dili, kinta ne’e.
Nia hateten, agora seidauk halo konstrusaun maibé tinan oin mak sei halo konstrusaun ba uma tipikál Leziaval iha Lautém-Lospalos.
“Ne’eduni ita labele halo agora tanba ami tama mós tinan klaran ona, ne’ebé ami planu ba tinan 2024,” nia dehan..
Antes ne’e, Prezidente Komisaun Le’e Ziaval, Novis Risamoto dehan, Komisaun Organizadora Le’e Ziaval hasoru malu ho Governu, liuliu parte SEAK sesante hodi aselera prosesu konstrusaun uma tipikál ne’e.
“Iha tinan kotuk komisaun hato’o ona nia pedidu ba Sekretáriu Estadu Arte no Kultura sesante, Teófilo Caldas, no halo audiénsia mós ho nia. Ikus mai ami simu informasaun katak ami-nia proposta pasa maibé to’o dalan klaran rezeita fali no ami lahatene nia kontinuasaun to’o agora,” nia esplika.
Uma Tipikál Lee Ziaval iha aldeia Sentrál, suku Fuiloro, postu administrativu Lospalos, Munisípiu Lautém, ahi han uma ne’e iha loron sábadu (11 Dezembru 2021) maizumenus tuku 10h00 dadeer.
Jornalista : Osória Marques
Editór : Cancio Ximenes
