BOBONARO, 19 outubru 2023 (TATOLI)-Sekretariadu Tékniku Administrasaun Eleitorál (STAE) munisípiu Bobonaro, kuarta ne’e, fó formasaun ba Pesoál STAE Apoia Aldeia (PSAA) no xefe aldeia 39 iha Postu administrativu Maliana hodi prepara ba eleisaun orgaun suku ne’ebé tuir kalendariu sei realiza iha 28 outubru 2023.
Diretór STAE munisípiu Bobonaro, Mariano Viegas Amarál, informa, formasaun durante loron rua ne’e atu hakbi’it PSAA no xefe aldeia sira-nia koñesimentu hodi implementa atividade preparasaun ba simu kadidatura xefe aldeia foun no delegadu ho delegada foun.
Notísia relevante:SEI enkoraja feto Bobonaro kompete iha eleisaun suku
“Estadu liuhosi Ministériu Administrasaun Estatál iha hanoin forma ekipa ne’ebé atu halao eleisaun iha aldeia no mós suku, nune’e bele iha koñesimentu bele implementa atividade ne’e ho di’ak, hahú hosi prosesu preparasaun, simu kandidatu, implementa eleisaun, to’o rezultádu sei fó sai” nia hateten iha atividade formasaun ne’ebé realiza iha salaun STAE munisípiu Bobonaro
Iha biban ne’e, Administradór postu administrativu Maliana, munisípiu Bobonaro, Tomas Laco Loe, husu ba xefe aldeia sira atu eskolla didi’ak ema na’in tolu ne’ebé lidera meza asembleia aldeia iha prosesu aprezentasaun kandidatura xefe aldeia foun no delegada ho delegadu foun.
“Ha’u atu hatete dehan eleisaun suku ne’e, servisu iha aldeia, atu susesu no la susesu ne’e iha aldeia, tanba asembleia suku ne’e atu halo apuramentu de’it, ne’ebé ita-boot sira tenke haree didi’ak, ema ne’ebé atu halo misaun ne’e karik fihir didiak sira-nia esperiénsia. Labele foti tomak ida mak ba ita ulun-moras bo’ot, priense akta de’it lahatene; ne’e akontese bebeik ona iha eleisaun liubá” nia propoen.
Iha fatin hanesan diretór, Ajénsia Fiskalizasaun Autóridade Munisípiu Bobonaro, Egidío Siga Mau, apela ba ekipa PSAA no xefe aldeia sira atu servisu ho onestidade no imparsialidade hodi fó susesu ba prosesu aprezentasaun kadiddatura to’o eleisaun remata.
“Labele mosu buat ida konflitu interrese, polítika buat kotuk ida, ida ne’e interrese ba ita-nia suku-laran. Labele dehan katak ida ne’e ita nia ema be, ita hatama mak nia, ne’e labele! ida ne’e krime eleitorál sei mosu ba ita-bot sira. Ha’u sujere ba ita-boot sira-nia ekipa atu toma responsablidade ba ita-boot sira-nia kna’ar,” nia sujere.
Enkuantu, iha tinan ne’e kandidatu xefe suku hamutuk 198 hosi númeru ne’e mane na’in 186 no feto 12 ne’ebé mai hosi Atabae na’in tolu, Balibo rua, Cailaco rua, Maliana haat no postu administrativu Loloto’e na’in ida.
Notísia relevante:Feto 12 iha Bobonaro sei kompete ho mane sira iha eleisaun lideransa komunitária
Jornalista: Sergio da Cruz
Editór: Rafael Ximenes de A. Belo
