PR Horta destaka área prioridade hitu ba kooperasaun iha Simeira ASEAN-GCC
ARABIA SAUDITA, 20 outubru 2023 (TATOLI)—Prezidente Repúblika (PR), José Ramos Horta, destaka área importante kooperasaun hamutuk hitu (7) durante iha simeira ASEAN-GCC (Gulf Cooperation Council).
Notísia Relevante: Fundu Dezenvolvimentu Arabia Saudita prontu apoiu investimentu iha Timor-Leste
Xefe Estadu hateten, iha diskusaun ne’e Timor-Leste foti nota ASEAN-GCC framework ba kooperasaun hodi fó enfaze área importante kooperasaun.
“Iha ne’e, tuir ha’u fó enfaze área xave hanesan iha ne’ebé Timor-Leste bele envolve no benefísiu hosi framework ne’e. Nune’e, destaka área importante kooperasaun hitu (7),” PR Horta hateten iha nia intervensaun durante simeira ASEAN-GCC iha ótel The Ritz-Carlton, Arábia Saudita, sesta ne’e.
Áre kooperasaun dahuluk, nia hateten, kooperasaun polítika no seguransa, partisipa iha reuniaun regulár iha nivel hotu-hotu hanesan observadór, no envolve iha kooperasaun seguransa sei fó inklui ba Timor-Leste ba dinámika polítika rejionál.
Daruak, kooperasaun ekonomia bele esplora oportunidade increased trade no investimentu ho GCC no membru Estadu ASEAN, no TL iha akordu investimentu ho Kwait no Katar ne’ebé asina iha tinan 2007 no 2012 no sei asina mós ho Emiradu Arábe Unidu.
Datoluk, agrikultura no seguransa alimentár, ba Timor-Leste ida-ne’e setór estratéjiku no ami iha kompromisu atu expande investimentu públiku iha área ne’e.
Dahaat, iha enerjia ne’e Timor-Leste iha kompromisu forte atu dezenvolve Greater Sunrise, Gas field no projeitu Tasi-Mane dezenvolve klastér industrial.
Dakimak, TL determina atu haforsa setór turizmu kooperasaun ho GCC no nasaun ASEAN iha área turizmu, heritage, kruzeiru no eko-turizmu.
Daneen, kooperasaun sósiu-kultrál liuliu kontaktu ema ho ema, edukasaun no inisiativa kapasidade ne’e Timor-Leste hakarak hametin ligasaun kulturál entre nasaun sira no tau matan ba sosiedade Timor-Leste.
Dahitu, konetividade ne’e Timor-Leste, ita-nia nasaun asina ona Air Sevices Agreements ho membru Estadu ASEAN balun, Qatar no Emiradu Emiradu Arábe Unidu, atu TL hetan ligasaun n omós hakarak utiliza oportunidade lokalizasaun estatéjika TL entre ASEAN no pasífiku.
Nune’e, Xefe Estadu hateten atu sai membru ASEAN hanesan objetivu estratéjiku ba Timor-Leste no konsidera susesu ba vizaun nasaun nian ne’ebé modernu, diversifika ekonomia no kualidade infraestrutura, saúde no edukasaun.
Prezidente Repúblika, José Ramos Horta sente onra halo parte reprezenta Timor-Leste hanesan observadór iha ASEAN-GCC no agradese ba Governu no povu Reinu Arabia Saudita simu delegasaun hosi TL, nune’e subliña importánsia hosi kooperasaun iha ámbitu ASEAN-GCC.
Laureadu Nobel da Paz ne’e mós hato’o preokupasaun kona-ba kestaun Myanmar no Gaza, ne’ebé aliña ho pozisaun ASEAN no Indonézia nian.
Iha simeira ne’e akompana hosi Vise Ministra ba ASEAN iha MNEK, Milena Rangel.
Enkuantu GCC inklui hosi Estadu Kuwait, Qatar, Oman, Arabia Saudita, Bahrain no Emiradu Arabe Unidu (EAU).
Partisipa iha simeira ne’e hosi Prezidente Repúblika Indonézia, Joko Widodo, King Salman, bin Abdulaziz Al Saud, Majesty Sultan Haji Hassanal Bolkiah, Sultan Brunei Darussalam, Sekretáriu Jerál ASEAN, Sekretáriu Jerál GCC no líder seluk tan.
Jornalista : Nelson de Sousa
Editór : Cancio Ximenes
