Autoridade Baucau komemora loron ezisténsia Munisipál ba dala-hitu
BAUCAU, 26 outubru 2023 (TATOLI) – Autoridade Administrasaun Munisipál Baucau, kinta ne’e, komemora loron ezisténsia Munisipál ba dala-hitu iha resintu Administrasaun Baucau.
Segundu Vise-Komisaun Organizadora, João Cancio Ornai, esplika, komemorasaun loron ezisténsia Autoridade Munisipál Baucau ba dala-hitu realiza ho atividade hanesan misa agradesementu, feira, atendimentu saúde, desportu no animasaun.
Atividade ne’ebé komisaun organizadora prepara hanesan feira – aprezenta produtu lokál hanesan hahán, hemun (bebida), artezenatu no tesilajen hanesan Tais, atendementu saúde foku ba cek up ka diagnosa funsionáriu Administrasaun sira-nia saúde no futeból-salaun ne’ebé kria jogu amizade entre funsionáriu sira inklui animasaun palku múzika aprezenta hosi banda lokál sira iha Baucau.
Prezidenti Autoridade Munisipál Baucau, Olivio ‘Bou-lesa’ Freitas, hateten, ezisténsia Autoridade Munisipál Baucau nu’udar loron inportante ba Baucau-oan tanba nu’udar referénsia ba funsionáriu hodi transforma no hasa’e hanoin atu kontribui ba dezenvolvementu munisípiu Baucau.
“Tinan aumenta ema mós tenke aumentu liuliu hahalok diak no ita-nia ema kualidade diak liu tan,” Olivio Freitas akresenta.
Bou-lesa husu funsionáriu hotu tenke iha evolusaun tuir tempu hahú hosi munisípiu, nasionál no internasionál nune’e prepra aan diak liutan hasoru situsaun iha futuru.
Partisipa iha loron ezisténsia Autoridade Munisipál Baucau maihosi Diretór liña ministeriál serbisu munisipál sira, veteranu, konviksaun relijiozu inklui komunidade iha munisípiu Baucau.
Autoridade Munisipál Baucau hahú eziste iha loron-26 fulan outubru 2016 bainhira VI governu konstitusionál deside halao transferénsia poder lokál liuhosi dekretu-lei númeru 3/2016 kona-ba statuta Administrasaun Munisipál, Autoridade Munisípiu no Grupu Tékniku Interministeriál Desentralizasaun Administrativa.
Jornalista : Natalino Belo
Editór : Rafael Ximenes de A. Belo
