DILI, 26 outubru 2023 (TATOLI)—Primeiru-Ministru, Kay Rala Xanana no Ministra Finansa, Santina Cardoso, hala’o enkontru ho Péritu no Reprezentante Timor-Leste ba asuntu Petrolíferu Dezenvolvimentu Infraestrutura no setór seluk tan, Peirre-Richard Prosper, hodi deskute kona-ba kooperasaun serbisu.
Biban ne’e, Primeiru-Ministru agradese oportunidade tanba bele fahe ona esperiensia ba malu kona-ba programa no bele hetan susesu iha ninia mandatu.
“Peirre-Richard Prosper uluk kedas fó apoia ba ita iha asuntu legál sira no asuntu seluk tan, nia mai atu ko’alia filafali asuntu saida de’it maka ita presiza nia apoia, sei kontinua ajuda iha área barak, ne’ebé enkontru ne’e di’ak tebes, señor Peirre-Richard sei ajuda nafatin ita,” Xanana hateten hafoin simu vizita hosi Péritu ne’e, iha Ministériu Finansa, Aitarak-laran, sesta ne’e.
Notísia relevante : Xanana: Setór Petrolíferu Pilár Fundamentál Dezenvolvimentu Nasaun
Peirre-Richard Prosper nu’udar matenek ida hosi Estadu Unidu Amérika (EUA) ne’ebé durante ne’e fó apoia advokasia ba nasaun dezenvolvidu sira inklui Timor-Leste hodi harii no hametin sistema Estadu iha área ekonomia, dezenvolvimentu infraestrutura, setór petrolífeiru, finansa no setór seluk tan ne’ebé liga kona-ba asuntu justisa.
Péritu ne’e serbisu besik liu ho Antigu Prezidente Repúblika EUA, Jorge Bush ba mandatu 2001-2005, ne’ebé iha momentu ne’ebá sai hanesan Embaixadór Jerál EUA ba asuntu justisa kriminál globál.
Durante ne’e, Peirre-Richard Prosper mós apoia Governu Timor-Leste hodi rezolve kestaun disputa fronteira tasi no rai tuir lei internasionál.
Peirre-Richard Prosper sente kontente tebes hala’o serbisu iha Timor-Leste hodi buka fó apoia ba asuntu importante sira ne’ebé ajuda hadi’a sistema Estadu nu’udar nasaun demokrátiku ne’ebé respeita ba regra no lei hotu ne’ebé vigora.
“Enkontru ida-ne’e di’ak tebes ho Primeiru-Ministru Xanana no ida-ne’e la’ós vizita dahuluk, maibé antes iha tinan 1999 ha’u mai ona, ami na’in- rua (PM Xanana) nia relasaun di’ak tebes no enkontru ho ema hodi ko’alia kona-ba saida maka ha’u bele apoia ba povu Timor-Leste hodi dezenvolve di’ak liután nasaun,” nia hatete.
Peirre-Richard Prosper, informa, programa ne’ebé Governu halo ona, nia prontu atu ajuda iha setór prioridade sira haree liu ba dezenvolvimentu infraestrutura, setór justisa no setór seluk tan ne’ebé importante tebes iha nasaun foun sira hanesan Timor-Leste.
Jornalista : Antónia Gusmão
Editora : Julia Chatarina
