COVALIMA, 31 Outubru 2023 (TATOLI)—Polísia Nasionál Timor-Leste (PNTL) munisípiu Covalima bandu joven sira atu hemu tua iha estrada no simitériu públiku, hodi selebra loron boot finadu iha tinan 2023.
Komandante PNTL Covalima, Superintendente Polísia Calisto Gonzaga, hateten mundu hotu selebra loron boot finadu la’ós Timor mesak mak selebra loron finadu hodi kari ai-funan no sunu lilin iha simitériu públiku.
“Ha’u fiar sidadaun hotu aproveita loron finadu ida-ne’e hodi ba kari ai-funan no sunu lilin iha simitériu no ita bele halo orasaun. Maibé, hanesan sidadaun tenke kumpre regra la autoriza sidadaun ka família atu halo festa, hodi hemu tua iha simitériu laran no iha Estrada,” Superintendente Calisto Gozaga hateten ba Tatoli, iha nia kna’ar fatin, Ssanta Rosa, tersa-ne’e.
Atu selebra loron boot finadu, ema hotu-hotu ba hamoos rate tanba ne’e komadante fo hanoin ba sidadaun sira atu kumpre regra hodi labele halo divertimentu, hemu tua iha fatin públiku.
“Ita bele ba hamoos rate maibé ita labele hemu tua hodi konsetra iha simitériu, sai fatin divertimentu hodi toka múzika. Ita bandu, ha’u fiar katak populasaun Covalima aproveita loron finadu atu bele halo orasaun ba ita-nia matebian sira para tulun ita,” nia dehan.
Loron boot finadu hanesan loron ne’ebé atu halo orasaun, kari ai-funan no sunu lilin iha simitériu, maibé labele kria problema ikus mai joven sira lakon futuru tanba joven-sira halo krime.
Sidadaun atu selebra loron finadu, Polísia Nasionál Timor-Leste garante seguransa ba sidadaun sira, nune’e livre halo movimentu durante iha oras 24 nia laran.
“Kona-ba seguransa ba loron finadu, ita nafatin fó asisténsia seguransa ba simitériu ne’ebé mak ita identifika ona. Ita-nia asisténsia la’ós atu halo presaun, ne’e lae. Ita fó asisténsia seguransa, nune’e sidadaun sira la’o livre,” nia hateten.
Tuir dadus, Ajente Polísia Nasionál Timor-Leste iha kamandu munisípiu Covalima hamutuk 148 ne’ebé balun destaka ba eskuadra hitu iha postu administrative hitu, no balun destaka iha komandu PNTL Covalima.
Jornalista : Celestina Teles
Editór : Cancio Ximenes