Komunidade Venilale preokupa ho rede telekomunikasaun

BAUCAU, 03 novembru 2023 (TATOLI)—Komunidade hosi postu administrativu Venilale, munisípiu Baucau, Hilário do Rego, preokupa ho rede telekomunikasaun hosi operadór telekomunikasaun Timor Telecom, Telemor no Telkomcel.
“Iha villa laran ne’e de’it mós difikuldade rede telekomunikasaun liuliu atu asesu rede internet susar tebes tanba liña jaringan laiha loo. Piór liu, iha tempu udan no anin boot,” nia hateten ba Agência Tatoli iha Venilale, sesta ne’e.
Nia dehan, problema seluk mak liuliu iha área rurál sira-ne’ebé dook hosi vila ne’e, rede telekomunikasaun atu komunika ba malu mós iha difikuldade.
Tanba ne’e, nia husu ba Governu liuhosi Ministériu Transporte no Telekomunikasaun (MTK) no operadór telekomunikasaun ne’ebé eziste iha Timor-Leste, atu tau atensaun ba preokupasaun hirak ne’e.
Nia husu atu solusiona liuliu instala ka aumenta tan tore liuliu iha área rurál sira no presiza duni instalasaun projetu fibrá optika ka kabu submarnu iha nasaun ne’e, tanba mundu ohin loron ho teknolójia la’o makaas hafasil asesu rede telekomunikasaun rede ho lalais.
Estudante Jonato Amaral mós preokupa ho rede telekomunikasaun ne’ebé susar atu asesu internet bainhira presiza atu komunika ba malu.
“Meiu internet ohin loron, ita haree ba parte pozitivu bainhira ita uza ho loloos, liuliu hanesan estudante matéria balun iha internet ita bele asesu halo leitura hodi aumenta koñesimentu. Tanba, mundu ohin loron teknolójia avansa tebes maibé iha ne’e difikuldade ida mak rede internet,” nia hateten.
Tuir observasaun jornalista Agência Tatoli iha terrenu hatudu katak, iha komunidade hetan difikuldade tebes hodi asesu rede telekomunikasaun atu asesu ba internet ne’e la’o lentu tebes.
Jornalista : Nelson de Sousa
Editór : Cancio Ximenes

