Promove partisipasaun feto ho defisiénsia iha dezenvolvimentu nasionál
DILI, 03 novembru 2023 (TATOLI) – Diretora Community Based Rehabilitation Network Timor-Leste (CBRNTL), Norberta Soares, destaka promosaun feto ho defisiénsia iha dezenvolvimentu nasionál.
“Ami hakarak sosiedade ida ne’e tau-atensaun ba iha ida ne’e liu-liu feto promove feto o defisiénsia sira-nia partisipasaun iha programa dezenvolvimentu nasionál. Tenke rona mós sira-nia hanoin no preokupasaun,” Diretora Norberta Soares hateten, iha ámbitu komemorasaun loron nasionál feto ba dala-47 ho tema ‘Feto prontu lidera, uluk, agora no futuru, ba Agência Tatoli.
Tuir ezekutiva ne’e, feto ho defisiénsia inklui mós mane sei hasoru problema iha asesu ba edifísiu públiku sira hanesan klínika, sentru saúde, ospitál no eskola tanba seidauk iha espasu própriu atu sira bele movimenta no asesu livre.
“Ita haree kondisaun eskada, haris-fatin la asesível. Distánsia do’ok husi sira-nia hela fatin mós sai dezafiu ida no barreira. Inkluzaun ema ho defisiénsia ba edukasaun sei menus, tanba ema ho defisiénsia mai ho tipu defisiénsia ne’ebé lahanesan ezemplu defisiénsia tilun, matan no fíziku,” nia refere.
Seluk, tuir nia, inkluzaun ema ho defisiénsia husi manorin-na’in sira iha estabelesimentu ensinu sira sai mós dezafiu ida tanba ema ho defisiénsia ne’e ho nia tipu oioin.
Diretora CBRNTL, Norberta Soares reforsa, feto ema ho defisiénsia seidauk hetan formasaun adekuada ba jestaun finanseira no lideransa atu hetan koñesimentu hodi bele envolve aan iha grupu sira iha aldeia no suku, no hetan mikro-kréditu sira seluk oinsá hetan rendimentu hodi responde ba nesesidade.
Iha Konstituisaun Repúblika Demokrátika Timor-Leste (RDTL), Artigu 21.o (Sidadaun ne’ebé iha defisiénsia) hateten, 1) Sidadaun ne’ebé iha defisiénsia fíziku eh mentál iha direitu no mós obrigasaun hanesan, sidadaun sira seluk, maibé sira sei la hala’o knaar hirak ne’ebé sira labele hala’o tanba de’it sira-nia defisiénsia; 2) Estadu, uainhira bele, promove protesaun ba sidadaun sira-ne’ebé iha defisiénsia, tuir lei haruka.
Kongratula feto
Nia mós kongratula feto Timor-Leste ba loron espesiál ohin, komemorasaun loron nasionál ba feto, hodi fó rekoñesimentu ba partisipasaun feto nian ba luta independénsia no dezenvolvimentu país.
“Iha loron nasionál ba feto, ita mós hakarak valoriza feto nia kontribuisaun no feto ho ema defisiénsia nia kontribuisaun ba iha dezenvolvimentu. Ema ho defisiénsia labele nonok no senti mesak, maibé hamriik ko’alia sai saida mak los no sala, liu-liu feto ho defisiensia, atu promove direitu feto iha inkluzaun sosiál, ba iha programa dezenvolvimentu ne’ebé akontese iha aldeia no suku iha ita-nia nasaun Timor-Leste,” nia konklui.
Loron nasionál ba feto komemora kada tinan iha loron 3 novembru, bazea ba desizaun Parlamentu Nasionál ho Lei Númeru 17/1/3/2005.
Komemorasaun loron ne’e hodi fó importánsia no rekoñesimentu ba partisipasaun feto nian iha tempu rezisténsia no iha dezenvolvimentu nasionál.
Loron 3 novembru, nu’udar mós loron ba Saudoza Maria Tapó nia mate tanba kauza Timor-Leste nian ba independénsia iha tinan 1975.
Notísia relevante:Loron 03 novembru fó rekoñesimentu ba feto Timor-Leste nia luta
Jornalista: Jesuína Xavier
Editór: Rafael Ximenes de A. Belo
