C12N husu Governu haloot mate-ruin 12 iha HNGV ho dignu
DILI, 06 novembru 2023 (TATOLI)— Prezidente Komité 12 Novembru (C12N), Gregório Saldanha, husu Governu atu bele haloot mate-ruin 12 iha Hospitál Nasionál Guido Valadares (HNGV) ho dignu.
Notísia Relevante: Kongresu Nasionál C12N datoluk atu halo revizaun ba estatutu
Nia hatutan, mate-ruin hirak ne’e mak mate-ruin hosi Hera nian hela haat (4) mak sei iha HNGV, mate-ruin neen (6) hosi Tasitolu no rua (2) seluk mak hosi Tibar ne’ebé daudaun ne’e rai hela iha ospitál.
“Uluk, ami kee-hetan mate-ruin iha Hera ne’e hamutuk 16. Ami identifika ona teste forensik ba ema nia ruin 12 no entrega ona ba família hodi haloot. Hela haat mak sei iha hela HNGV. Depois ami deskobre iha Tasi-Tolu iha Pelican Paradise nia fatin hamutuk sia (9) no ami halo teste identifika tolu (3) no entrega ona ba família sira. Neen (6) mak sei rai hela ne’ebá. Ho tan mate-ruin rua (2), ami deskonfia ruin saudozu Sabalae Remizio nian maibé la’ós, ami hetan foho tutun Nasuta Tibar,” nia dehan ba jornalista sira, hafoin halo abertura ba kongresu datoluk iha Sentru Konvensau Dili (CCD-sigla portugés), segunda ne’e.
Komité 12 Novembru koopera no hein katak Governu bele haloot asswa’in sira-nia ruin la’ós agora kedas atu rezolve maibé preisza tempu hodi prosesu ne’e la’o, importante mak hahú ona nune’e asswa’in sira-ne’ebé mak ruin soe hela ne’e bele identifika no família sira bele haloot ho dignu.
Hafoin halo teste forénsika, nia hateten, saudozu 12 identifikadu nu’udar mártir 12 Novembru ne’ebé kee hosi rate sira semitériu Hera, no tolu nu’udar asswa’in sira 12 Novembro nian ne’ebé oho no hakoi iha Tasi Tólu.
Nia dehan, hosi saudozu sira-ne’e nia ruin ne’ebé identifikadu hosi teste forensika, C12N entrega ona ba família hodi haloot iha fatin ne’ebé sira merese atu haloot ba.
“C12N simu nafatin informasaun kona-ba ema lakon, no Divizaun Ema Lakon no Forensik la’o buka tuir kedas. Maibé prátika hatudu katak informasaun sira-ne’e seidauk garante nia verasidade 100%,” nia dehan.
Jornalista : Osória Marques
Editór : Cancio Ximenes
