iklan

ELEISAUN, MUNISÍPIU, SEGURANSA, VIQUEQUE

PNTL postu Uatulari bandu abitante konsumu álkool iha sentru votasaun

PNTL postu Uatulari bandu abitante konsumu álkool iha sentru votasaun

Komadante PNTL Eskuadra Uatulari, Asistente Inspetór, Pedro da Cruz de Carvalho. Imajen Tatoli/Vitorino Lopes da Costa

VIQUEQUE, 09 novembru 2023 (TATOLI)—Poísia Nasionál Timor-Leste (PNTL) bandu abitante sira hotu iha postu administrativu Uatulari, munisípiu Viqueque labele konsumu álkool besik iha fatin votasaun, nune’e eleisaun órgaun suku segunda volta ne’ebé sei realiza iha loron 13 novembru 2023 bele la’o ho hakmatek.

“Iha eleisaun órgaun suku primeira volta foin lalais ne’e ami identifika ema balun konsumu álkool, ho nune’e ami alerta ba abitante hotu atu labele konsumu álkool subar-subar iha sentru votasaun, bainhira mai mak ami hetan, ami sei la tolera,” Komandante PNTL Eskuadra Uatulari, Asistente Inspetór Pedro da Cruz de Carvalho, informa ba Agência Tatoli, iha postu Uatulari, kinta ne’e.

Notísia relevante : CNE husu líder komunitáriu Viqueque organiza di’ak eleisaun órgaun suku segunda volta

Nia husu abitante sira-nia kolaborasaun hamutuk ho Autoridade segurasaun sira hodi asegura festa família iha postu Uatulari bele la’o hakmatek no pás nia laran.

Aleinde ne’e,  nia relata, eleisaun órgaun suku primeira volta la’o hakmatek.

“Ami observa la’o hakmatek, nune’e ba segunda volta ami sei garante seguransa nune’e presiza kontribuisaun mós hosi parte autoridade lokál sira hodi asegura eleisaun ida-ne’e bele la’o hakmatek no susesu,” nia tenik.

Nia husu ba líder komunitáriu sira inklui Konsellu suku atu nafatin fó hanoin ba populasaun iha suku ida-idak, nune’e bainhira tama ba eleisaun segunda volta, populasaun sira bele kria pás no estabilidade iha postu Uatulari.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!