PM Xanana observa direita kondisaun Eskola EBC Balibar
DILI, 13 Novembru 2023 (TATOLI)– Primeiru Ministru, Kay Rala Xanana Gusmão hala’o observasaun direta ba kondisaun fiziku Eskola Ensinu Bazika Central (EBC) Aldeia Fatuloda, Suku Balibar, Postu Administrativu Cristo Rei, Munisípiu Dili ne’ebé ho kondisaun ladun diak ona no presiza hala’o rehabilitasaun urjente.
EBC Balibar antes ne’e harii iha tempu Português no kontinua utiliza to’o iha tempu okupasaun Indonezia to’o mai iha ukun aan, hafoin iha tinan 2006 hetan apoiu rehabilitasaun husi parseiru Rotary Austrália ho Ministériu Edukasaun.
“Dadaun ne’e kondisaun fiziku edifisiu eskola nian komesa nakfera no kalen no plafon naksobu sai hotu kauza hosi rai monu halo simente nakfera hafoin mosu dezastre naturáis iha loron 04 Abril 2021,” haktuir Komunikadu Imprensa ne’ebé Tatoli asesu, segunda ne’e.
Hafoin hala’o observasaun, PM Xanana kontaktu kedas parte Ministériu Edukasaun hodi haree problema ne’e atu bele rezolve hodi labele afeita ba estudante sira nia prosesu aprendizagen.
Eskola ne’e mós enfrenta problema menus kadeira no meza ba alunus sira inklui livru no kondisaun biblioteka ladun di’ak.
Eskola Bazika Central (EBC) Aldeia Fatuloda ho sala eskola- 6, no iha anu letivu 2023 ho totál alunus hamutuk 192, professor nain 17 lidera hosi Koordenador Eskola, Alcina Exposto Sarmento.
Jornalista : Cidalia Fátima
Editora : Armandina Moniz
