LIQUIÇÁ, 13 novembru 2023 (TATOLI) – Postu saúde iha suku Mota-Ulun, postu administrativu Bazartete, munisípiu Liquiçá, desde marsu rejista pasiente ho Insfesaun Vias Respiratóriu Aguda (ISPA) hamutuk 1.342. Informasaun ne’e hato’o husi responsável tutela, Francisco da Silva.
“Tuir dadus, pasiente ho tinan 15 ba leten hamutuk 513, sira ne’ebé ho tinan lima to’o 14 hamutuk 180, ida too haat hamutuk 414 no menus husi tinan ida hamutuk 235. Além ne’e, moras sira seluk ne’ebé rejista ho númeru kiik mak hanesan diareia, moras kulit no ipertensaun”, Francisco da Saliva informa ba Tatoli, iha Mota-Ulun, segunda ne’e.
Iha entrevista, dirijente ne’e esplika katak infesaun respiratória kauza husi vírus, baktéria no kualidade anin ne’ebé la di’ak ka poluisaun atmosférika, inklui fatór sira seluk hanesan konsumu no haris be’e ne’ebé la moos.
Kestiona kona-ba aimoruk, Francisco da Silva informa katak iha postu sáude ne’e medikamentu sira sufisiente hodi atende pasiente sira, tanba kada fulan sempre hato’o relatóriu ba Servisu Saúde Munisipál hodi garante estoke, maibé nia akresenta katak, postu refere sei menus espasu hudi fó atendimentu ba inan-sira ne’ebé atu partus.
“Iha deit kuartu ki’ik ida, nune’e lasufisiente hodi atende inan-isin rua sira, tanba kada fulan parteira sira iha postu saúde ne’e atende inan-isin rua bele to’o 13”, nia subliña.
Assuntu refere hato’o ona ba Servisu Saúde Munisipál no tékniku sira halo ona levantamentu dadus no hein iha Orsamentu Jerál Estadu 2024 bele solusiona kestaun ne’e.
Tuir dadus, husi janeiru to semana daruak fulan ne’e, postu sáude Mota-Ulun atende ona inan-sira ne’ebé partus hamutuk 86 no la rejista vítima mortál.
Postu saúde Mota-Ulun iha pesoál saúde na’in-haat, kompostu hosi médiku na’in-ida, enfermeiru na’in-ida no parteira nain-rua hodi fó atendimentu ba abitante sira husi suku ne’e, inklui mós komunidade viziñu husi suku Lauhata, Ulmera, Fatumasi no Fahilebo.
Notísia relevante: Moras ISPA mai husi ambiente ne’ebé mak la moos
Jornalista: Afonso do Rosário
Editora: Isaura Lemos de Deus
