Membru PNTL Bobonaro na’in-25 envolve iha GAM
BOBONARO, 24 novembru 2023 (TATOLI) – Membru Polísia Nasionál Timor-Leste (PNTL) Munisípiu Bobonaro, na’in-25 prienxe formuláriu ho idetindade katak envolve-aan iha Grupu Arte-Marsiál (GAM).
Komdante PNTL Munisípiu Bobonaro, Superintedente Xefi António de Sá, esplika, membru hirak-ne’e envolve iha Grupu Arte-Marsiál, Persaudaraan Setia Hati Terate (PSHT), Ikatan Kera Sakti (IKS) no Kmanek Oan Rai Klaran (KORK).
Notísia relevante: Komando PNTL Bobonaro hahú identifika membru involve iha GAM
“Komandu identifika ona membru na’in-25, sira balu partisipa antes iha 1999 ba kotuk, maibé barak Liu mak iha ukun-aan iha 2000 mai leten, sira balu tuir tiha mak tama PNTL, balu fali tama tiha Polísia mak foin tuir,” nia ko’alia iha Maliana, sesta ne’e.
Eis Komandante PNTL Munisípiu Baucau ne’e subliña, dadus refere aban, sábadu loron (25/11) ne’e sei submete ba Komandu Jerál PNTL hodi aprezenta ba Governu.
Prosesu identifikasaun ba membru PNTL ne’ebé envolve iha GAM no GAR bazea ba orientasaun hosi Primeiru-Ministru, Kay Rala Xanana Gusmão, liuhusi Ministru Interiór, Francisco Guterres, katak membru Polísia ne’ebé envolve iha grupu refere tenke halo juramentu iha 28 novembru 2023, nune’e bele halo serbisu ho independente no profisionál hodi defende povu no la’ós defende grupu.
Tuir rezolusaun Governu númeru 45/2023, 10 novembru, determina suspensaun kona-ba ensinu aprendizajen no prátika arte-marsiál ho adosaun medida hodi asegura orden públika. Suspensaun ne’e halo tanba akontese insidente foin lalais iha fatin ketak-ketak iha territóriu nasionál, ne’ebé envolve elementu arte-marsiál sira-ne’ebé pertense ba grupu refere.
Totál inisidente 54 ne’ebé rejista mak ema sira-ne’ebé mate hamutuk na’in-haat no kanek todan na’in-26, ho tán danu ka estragu ba sasán hanesan uma 21 no veíkulu (karreta no motorizada) sanulu.
Notísia relevante: PNTL Bobonaro detein ema na’in-rua kontra regra eleisaun
Jornalista: Sérgio da Cruz
Editór: Evaristo Soares Martins
