Governu laiha dúvida servisu hamutuk ho setór privadu
DILI, 25 novembru 2023 (TATOLI)—Vise Primeiru-Ministru no Ministru Koordenadór Asuntu Ekónomika no Ministru Turizmu no Ambiente, Francisco Kalbuadi Lay, hateten Governu laiha dúvida atu servisu hamutuk ho setór privadu hotu hodi dudu ekonomia nasaun nian ba oin.
Notísia Relevante: Forum Internasionál Business la’o ho susesu, Kalbuadi agradese Xanana-Horta
“Setór privadu hotu, Governu sei tau matan ba imi hotu atu dudu ekonomia nasaun nian liuhosi fasilidade oioin hanesan fó kreditu no projetu sira maibé la’o tuir lei ne’ebé mak eziste,” Kalbuadi Lay hateten iha ambitu Forum Internasional Business ba loron ikus nian iha Salaun GMN Bebora Dili, sábadu ne’e.
Tanba ne’e, nia husu ba emprezariu timoroan hotu atu prepara aan hodi koopera hamutuk ho Governu hadi’a ekonomia nasaun nian hamutuk ho investór internasionál sira.
Prezidente Kamâra Komérsiu Indústria Timor-Leste (CCI-TL), Jorge Serano, agradese ba IX Governu ne’ebé realiza duni promesa ne’ebé durante ne’e halo hodi fó dalan ba setór privadu sira atu investe no dada mós investór hosi internasionál, atu mai investe hodi dudu ekonomia Timor-Leste ba oin.
“Lori kolega emprezariu tomak nia naran agradese ba IX Governu tanba hatuur duni komprimisiu iha prograna Governu nian atu servisu hamutuk ho setór privadu sira. Agradese ba Primeiru-Ministru hanesan aman ba nasaun ida-ne’e, aman ba povu tomak no aman mós ba emprezáriu sira hotu iha nasaun ida-ne’e,” nia hateten.
Timor-Leste Forum Internasionál Business ne’e hala’o durante loron tolu iha Salaun GMN Dili hahú 23-25 novembru 2023, ne’ebé partisipa hosi emprezáriu internasionál hamutuk nasaun 28 ne’ebé kompostu hosi ema hamutuk na’in-252 ne’ebé barak liu mai hosi Xina.
Jornalista : Hortencio Sanchez
Editór : Cancio Ximenes
