VIQUEQUE, 27 novembru 2023 (TATOLI)—Kombatente libertasaun nasionál na’in-193 hosi munisípiu Viqueque, segunda ne’e, simu medalla kondekorasaun hosi Estadu Timor-Leste, iha ámbitu komemorasaun loron proklamasaun independénsia ba dala-48 (28 novembru 1975).
“Ohin sai loron espesiál ba munisípiu 13 tanba Estadu distribui medalla kondekorasaun ba kombatente sira inklui munisípiu Viqueque, ne’ebé hamutuk na’in-193. Distribuisaun medalla ba kombatente sira nu’udar rekoñesimentu ida hosi Estadu no Governu, ne’ebé rejista hosi tinan 2003 to’o 2005,” Sekretáriu Estadu ba Asuntu Antigu Kombatente Libertasaun Nasionál no Veteranu, Cesar dos Santos da Silva ‘Merak’, hateten liuhosi diskursu iha salaun munisipál, Viqueque Vila.
Governante ne’e dehan, rekoñesimentu ba kombatente sira tanba kontribuisaun ba prosesu luta ba libertasaun.
“Tuir loloos medalla kondekorasaun ne’e atu atribui aban 28 novembru, maibé tanba haree aban Governu okupadu maka ita atribui agora,” nia akresenta.
Notísia relevante : Kombatente Viqueque na’in-185 sei simu medalla orden Nicolau Lobato
Medalla kondekorasaun ne’e tolu, kompostu hosi ordem guerilla, ordem funu na’in no ordem Nicolau Lobato, maibé maioria simu ordem Nicolau Lobato.
“Distribuisaun agora ne’e la’ós ikus ba munisípiu Viqueque, maibé kombatente rejistadu sei barak maka seidauk simu medalla. Nune’e ami sei haree fali tempu seluk hodi distribui tan ba sira,” nia tenik.
Kombatente hosi Viqueque ne’ebé simu medalla mak hanesan Orden Guerilla na’in-rua, Orden funu na’in-neen no Orden Nicolau Lobato na’in-185.
Iha fatin hanesan, Administradór munisípiu Viqueque, Januáriu Soares ‘Bolly’, hateten, veteranu sira luta maka konkista vitória ukun rasik-an, nune’e Estadu Timor-Leste atribui medalla kondekorasaun.
“Ami agradese ba Estadu no Governu ne’ebé atibui medalla ba kombatente sira. Veteranu sira kontribui ba luta rai ida-ne’e maka ohin loron Timor-Leste hetan ukun rasik-an. Tanba ne’e, veteranu maka sai ai-rin ba nasaun Repúblika Demokrátika Timor-Leste nune’e presiza hetan atensaun hosi Estadu,” nia tenik.
Distribuisaun medela kondekorasaun ne’e ba veteranu sira hosi postu administrativu lima hanesan Uatulari, Uatucarbau, Ossu, Viqueque Vila no Lacluta.
Serimónia atribuisaun medalla hetan partisipasaun hosi Ministru Agrikultura, Peska, Pekuária no Floresta, Marcos da Cruz, Brigaideru FALINTIL-Forsa Defeza Timor-Leste (F-FDTL), Sabika Besi Kulit, Konsellu Veteranu munisípiu Viqueque, Komandante Polísia Nasionál Timor-Leste (PNTL) inklui família hosi kombatente sira iha Viqueque.
Jornalista : Vitorino Lopes da Costa
Editora : Julia Chatarina
