VIQUEQUE, 05 dezembru 2023 (TATOLI)–Institutu Jestaun Ekipamentu, Intitutu Públiku (IGE, I.P) kria ona kampu futeból rua ba suku Macadique no suku Matahoi iha postu administrativu Uatulari, munisípiu Viqueque.
Xefe suku Macadique, Afonso dos Reis, hateten, durante ne’e iha duni kampu futeból maibé ho kondisaun ladun di’ak , nune’e bainhira realiza jogu futeból ruma difísil tanba laiha kampu alternativa ruma.
“Ha’u halo proposta hamutuk ho xefe suku Matahoi iha tinan 2021 hodi husu apoia ba IGE atu halo ami-nia kampu, maibé iha tinan 2021 no 2022 IGE la mai halo kampu. Foin lalais fulan-novembru ne’e, sira foin destaka ekipamentu pezadu mai suku hodi aterru kampu futeból ba suku Macadique no suku Matahoi,” Líder komunitáriu informa ba Agência Tatoli, iha resintu administrasaun munisípiu Viqueque, tersa ne’e.
Notísia relevante : Ministru Nélio ho Embaxadór Korea Súl observa konstrusaun kampu futebol
IGE, I.P halo kampu futeból ba suku Macadique ho rai mutin, maibé sei ateru tan rai henek maka foin bele utiliza.
“Ami-nia kampu aterru ho rai mutin ne’e hotu ona, sei kontinua tan aterru fali rai henek. Ba suku Matahoi daudaun ne’e ekipa IGE aterru hela rai mutin ba kampu futeból. Ha’u haree kampu ne’ebé IGE kria ba ami di’ak ona, durante ne’e kampu laiha nune’e difikulta joven sira atu loke torneiu ruma,” nia relata.
Autoridade no abitante lokál sei uza kampu ba atividade desportiva suku atu motiva joven sira-ne’ebé iha talentu futeból no kria torneiu ruma ba joven sira.
“Ha’u sente kontente tanba IGE apoia ona ami atu joven sira bele iha vontade halo atividade desportiva no halakon hanoin violénsia sira,” Afonso dos Reis, hato’o.
Kampu futeból lokaliza iha área Liakaiua suku Macadique no kampu seluk iha área Miabuti,suku Matahoi.
Suku Macadique kompostu hosi aldeia 21, ho totál populasaun na’in-7.482 (feto 3.630 no mane 3.852) hosi uma-kain 1.773, enkuantu suku Matahoi iha aldeia 12 ho totál populasaun 4.492 (sensu 2015).
Jornalista : Vitorino Lopes da Costa
Editora : Julia Chatarina
