Governu sei harii prezépiu ba dame selebra Natál-tinan foun 2024
DILI, 06 dezembru 2023 (TATOLI)–Ministru Administrasaun Estatál (MAE), Tomás Cabral, hateten iha selebrasaun natal 25 dezembru no tinan foun 2024 ne’e, Governu sei harii prezépiu ba dame iha territóriu nasionál ne’ebé sei la uza material importasaun.
“Ami deskute kona-ba asuntu ida-ne’e tanba ita-nia Primeiru-Ministru Kay Rala Xanana Gusmão deklara ona. Nune’e, ami sei diskute hamutuk ho Prezidente Konsellu Ministru, hafoin sei fós sai,” Ministru Tomás Cabral hateten hateten iha konferénsia nasionál no selebrasaun PNDS ba dala-10, iha Sentru Konvensuan Dili (CCD, sigla portugés), tersa (05 dezembru 2023) ne’e.
Iha prezépiu ba dame ne’e sei la autoriza uza gravadór no toka iha prezépiu laran maibé uza de’it materiál lokál no materiál seluk sei la foti hosi rai-li’ur.
“Ita halo buat tolu ne’e hodi kontribui ba dame no estabilidade ba rai ida-ne’e,” nia dehan.
Antes ne’e, liuhosi nota imrensa, Primeiru-Ministru, Kay Rala Xanana Gusmão, hateten delega ekipa hodi hala’o vizita bá munisípiu no bairru idak-idak atu halo avaliasaun ba prezepiu, nune’e ekipa juri bele haree ida ne’ebé di’ak-liu bele hetan prémiu hosi Governu.
“Ha’u apela ba juventude iha Dili no munisípiu hotu iha kada suku, imi hola parte ba tuir kompetisaun harii prezépiu natál hanesan uluk halo tiha ona. Ho ida-ne’e sei fó prémiu primeiru to’o quinto lugar ne’e ba prezépiu di’ak liu,” Xefe Governu apela.
Aleinde ne’e, Governu la permite atu juventude sira kria konflitu durante selebrasaun loron santu natál no tinan foun. Tanba loron ne’e atu lori moris dame no ksolok ba ema hotu.
Daudaun ne’e Governu mós harii ona prezepiu iha Palasiu Governu no Palásiu Prezidensiál Prezidente Nicolau Lobato Dili, inklui jardin sira iha sidade Dili komesa monta ona lampu oin-oin hodi hafurak ambiente natál no tinan foun.
Notísia Relevante: PM Xanana husu juventude hola parte iha kompetisaun harii prezépiu natál
Jornalista : Osória Marques
Editór : Cancio Ximenes
