DILI, 15 dezembru 2023 (TATOLI)–Parlamentu Nasionál (PN), sesta ne’e, liuhosi debate espesialidade aprova Orsamentu Jerál Estadu (OJE) 2024 ba Ministériu Administrasaun Estatál (MAE) hamutuk millaun $54,4 ho votu a-favór 42, kontra sia (9) no abstensaun 13.
“Ho nune’e, orsamentu ba Ministériu Administrasaun Estatál aprova,” Prezidente Parlamentu Nasionál, Maria Fernanda Lay, hateten iha sala plenária PN.
Orsamentu Ministériu Administrasaun Estatál (MAE) hamutuk $54.409.666 ne’e aloka ba saláriu no vensimentu $13.560.352, bens no servisu korrente $11.705.694, transferênsia públika $27.157.020, kapitál menór $1.986 no kapital dezenvolvimentu zero (0).
Tuir livru proposta-lei OJE 2024 planu asaun anuál hosi Ministériu Administrasaun Estatál (MAE) fó prioridade ba programa desentralizasaun administrativa no poder lokál $30.482,492, programa funsionamentu no dezenvolvimentu institusionál $20.842,366, programa inkluzaun sosiál $46.800, programa toponímia no organizasaun urbana $1.590.744 no programa dezenvolvimentu lokál $1.447.264.
Jornalista : Osória Marques
Editór : Cancio Ximenes
