PR Horta husu hakribit violénsia-hamutuk halo rekonsiliasaun dezenvolve TL
DILI, 18 dezembru 2023 (TATOLI)—Prezidente Repúblika, José Ramos Horta, husu timoroan hotu-hotu atu hakribit violénsia no hamutuk halo rekonsiliasaun hodi dezenvolve Timor-Leste (TL) iha loron aban.
“Tinan ida-ne’e no tinan foun be mai, Prezidente Repúblika nia mehi buka kontribuisaun para hotu-hotu selebra natál ho haksolok no dame nia laran, simu malu, perdua malu, rekonsiliasaun no hamutuk iha unidade soe violénsia. Simu Na’i Maromak nia mensajen dame no rekonsiliasaun iha tinan foun mai 2024, nune’e Timor bele la’o ba oin hodi halo dezenvolviumentu nasionál,” Xefe Estadu ne’e hateten ba jornalista sira iha Palásiu Prezidensiál Nicolau Lobato, Bairru Pite, segunda ne’e.
Tanba, Xefe Estadu ne’e hateten situasaun iha mundu susar tebes ba rai hotu-hotu tanba funu boot boot iha Gaja-Palestina no mosu konflitu oioin, ne’ebé afeta ekonomia tanba de’it la simu malu no la halo diálogu.
“Ne’e duni, ita Timor-Leste buka hakle’an dame no demokrásia. Governu tenke tau matan di’ak liu ba ki’ak sira, fó tulun ba setór privada sira, nune’e setór privada fó empregu hodi hatun dezempregu no hadi’a povu nia moris,” nia dehan.
Jornalista : Osória Marques
Editór : Cancio Ximenes
