DILI, 19 dezembru 2023 (TATOLI) – Ministériu Edukasaun (ME) hasai ona sirkulár ida bazeia ba dekretu lei númeru 33/2023, 31 de maio, hodi kontinua regula lala’ok matríkula ba estudante foun nível ensinu sekundáriu jerál no tékniku vokasionál ba tinan 2024 iha Munisípiu Dili.
Diretór Jerál Edukasaun Ensinu, Deolindo da Cruz relata katak sirkulár kona-ba limitasaun matríkula foun iha Munisípiu Dili ne’e hasai husi Sekretária Estadu Edukasaun Ensinu Sekundáriu Eskola Téknika ho razaun atu redús númeriu estudante iha Munisípiu Dili nune’e Ministériu Edukasaun bele halo kontrolu ba kualidade edukasaun iha territóriu nasionál inklui iha Munisípiu Dili.
“Ha’u hakarak hateten bazeia ba sirkulár governante iha Ministériu Edukasaun ne’e mak agora iha ha’u nia mandatu hanesan Diretór Jerál Edukasaun Ensinu ha’u sei aselera polítika ida-ne’e hodi halo kontrolu ba eskola tékniku vokasionál públiku sira iha Dili atu la simu estudante foun sira tuir eskola nia hakarak,” Deolindo ba jornalista sira iha ME, Vila Verde, tersa ne’e.
Nia haktuir sirkulár Ministériu nian ne’e espalla ona ba eskola sira hotu iha territóriu nasionál nune’e estudante sira husi munisípiu bele hatene karik atu mai eskola iha Dili tenke lee sirkulár ne’e atu labele prejudikadu.
“Ha’u hakarak hateten ba profesór no estudante hotu iha territóriu nasionál espesiál ba alin estudante sira ne’ebé mak hakarak aplika sira-nia vaga atu sai estudante iha eskola públika sira iha Munisípiu Dili atu labele viola sirkulár ne’ebé mak fó-sai ona,” Deolindo realsa.
Nia dehan katak prosesu matríkula ba estudante foun iha Munisípiu Dili espesiál ba estudante foun ensinu sekundáriu jerál no tékniku vokasionál nian Ministériu Edukasaun termina númeru estudante másimu 40 kada aula no estudante ne’ebé atu matríkula foun tenke aprezenta ho dokumentu formál ka legál sira ne’ebé termina ona mak hanesan aprezenta kartaun fixa família Munisípiu Dili nian, aprezenta deklarasaun xefe aldeia husi suku sira iha Dili laran, depois tenke submete mós dokumentu komprovativu katak inan ka aman servisu iha Dili.
Nia informa estudante sira ne’ebé sira-nia edukativu espesiál ne’e tama iha kategória ema ho defisiénsia mós bainhira atu halo rejistrasaun iha eskola públika sira iha Dili tenke submete sira-nia dokumentu komprovativu defisiénsia iha Dili.
Jornalista: Tomé Amado
Editór: Rafael Ximenes de A. Belo
