iklan

EDUKASAUN

OJE ba INCT $720.105, prioriza programa dezenvolvimentu institusionál no edukasaun

OJE ba INCT $720.105, prioriza programa dezenvolvimentu institusionál no edukasaun

Imajen Google

 DILI, 19 dezembru 2023 (TATOLI) – Orsamentu Jerál Estadu (OJE) 2024 ba Institutu Nasionál Siénsia no Teknolojia (INCT-sigla Portugés) ho montante $720.105 sei aloka ba programa prioridade rua mak hanesan programa funsionamentu no dezenvolvimentu institusionál, programa edukasaun no formasaun.

Orsamentu ne’ebé pasa ona iha debate espesialidade iha Plenária Parlamentu Nasionál ho votu afavór 41, kontra 2 no abstensaun 21, iha tersa ne’e, ninia kategoria kompostu hosi saláriu no vensimentu $288.274, bens no servisu $251.831, transferénsia públika zero, kapitál menór $150.000 no kapitál dezenvolvimentu $30.000.

Vise Prezidente INCT, Agostinho da Conceição Soares relata katak orsamentu ne’ebé mak INCT prevee ona iha OJE 2024 ne’e ho intensaun atu realiza atividade no programa sira ne’ebé mak iha relasaun ho atividade tékniku nian inklui peskiza sira tanba papél INCT nian mak atu promove siénsia ba universidade sira nune’e bele pro ativu liután.

“Ha’u hakarak dehan orsamentu INCT nian ne’e sei kategória ki’ik maibé ami sei halo nafatin esforsu hodi kontinua reliza atividade sira ne’ebé ami trasa ona nune’e bele promove siénsia iha ita-nia rai,” nia dehan ba Tatoli iha edifísiu INCT, Balide.

Tuir Agostinho katak INCT hanesan instituisaun ida-ne’ebé iha misaun atu promove siénsia no teknolojia liuhusi área peskiza aplikada no peskiza puru.

Dirijente ne’e afirma liután katak bainhira nasaun ida laiha ninia atividade peskiza mak dezenvolvimentu iha Nasaun mós sei labele la’o ho di’ak.

Nia hatutan, peskiza nu’udar atividade ida-ne’ebé importante tebes atu tulun Estadu no Governu hodi dezenvolve Nasaun.

Jornalista: Tomé Amado

Editór: Rafael Ximenes de A. Belo

 

 

 

iklan
iklan

Leave a Reply

iklan
error: Content is protected !!