ME konsidera ESTVTH Becora sei redús taxa dezempregu iha TL

DILI, 19 dezembru 2023 (TATOLI) – Ministériu Edukasaun (ME) sei apoiu materiál prátika ba Eskola Sekundáriu Tékniku Vokasionál Turizmu Hospitalidade (ESTVTH) Becora tanba konsidera eskola refere sei redús taxa dezempregu iha Timor-Leste.

Ministra Edukasaun, Dulce de Jesus Soares bainhira hala’o vizita bá ESTVTH, tersa ne’e, promete ba dirijente sira katak tinan oin (2024) sei distribui materiál prátika ba eskola ne’e atu promove eskola refere sai koñesidu iha nasaun ne’e no mós atu fasilita estudante sira bele hala’o sira-nia atividade prátika ho di’ak liután.

“Ita sei apoiu liután eskola ne’e tanba ita rasik haree hetan ESTVTH ne’e iha objetivu ida ba futuru sei redús taxa dezempregu iha nasaun ne’e,” Dulce ba jornalista sira iha ESTVTH Becora.

Tuir nia katak maski eskola ne’e iha objetivu klaru maibé to’o ohin loron eskola ne’e seidauk sai eskola téknika ida-ne’ebé importante ba estudnate sira. Dala-barak estudante Terceiro Sículo Nono Ano ne’ebé finaliza sira-nia eskola uitoan de’it mak hili tama iha eskola ESTVTH.

“Hanesan dirijente másima ida iha Ministériu Eduaksaun ne’e sente preokupadu tebes no deside mai halo vizita iha eskola ne’e inklui hakarak atu promove ba estudante feto ka mane katak ESTVTH ne’e nu’udar eskola ida-ne’ebé sei garante futuru ba estudante sira,” nia haklaken.

“Ohin ha’u mai iha eskola ne’e tanba ha’u rona eskola ne’e to’o agora foin mak rejista ninia estudante foun 2024 nian hamutuk na’in 19 de’it. Tan ne’e, ha’u mai atu enkoraja estudante sira katak ESTVTH ne’e eskola ida-ne’ebé iha futuru ne’ebé klaru. Bainhira estudante sira akaba iha eskola ne’e sei la difísil atu buka servisu,” nia hatutan.

Nia haktuir, eskola ida-ne’e iha duni kualidade tanba estudnate sira ne’ebé mak akaba iha eskola refere barak mak hetan ona servisu iha otél sira ezistente iha nasaun ne’e.

Enkuantu, Diretora ESTVTH, Saturnina Fernandes reforsa tan katak eskola ida-ne’e sempre fó oportunidade ba estudante sira molok ramata sei halo sira-nia estájiu iha indústria sira. Dala-barak estudante sira ne’ebé hala’o estájiu iha indústria ne’e hetan kedas kontratu ho indústria.

“Ho nune’e hakarak enkoraja alin sira ne’ebé foin akaba sira-nia estudu iha Terceiro Sículo Nono Ano bele mai tama iha ESTVTH ne’e, ho departamentu ne’ebé rejistadu ona mak turizmu otelaria, kulinária, modelajen no SPA no sira seluk tan. Área sira-ne’e mak fásil ba estudante sira atu hetan lalais servisu.

Jornalista: Tomé Amado

Editór: Rafael Ximenes de A. Belo