DILI, 21 dezembru 2023 (TATOLI) – Sekretaria Estadu Arte no Kultura (SEAK) tau ona importansia hodi elabora matéria didátika kona-ba tais hodi hatama iha kurríkulu eskola bázika nune’e bele hanorin estudante Terceiro Sículo Nono Ano iha tinan oin.
Diretora Nasionál Patrimóniu Kulturál SEAK, Irene Gonçalves dos Reis relata katak elaborasaun matéria didátika kona-ba tais ne’e rasik SEAK hahú ona liuhusi atividade workshop ne’ebé halo ba profesór na’in 50 iha Dili atu sira bele iha koñesimentu hodi fó mós hanoin ruma relasiona ho kolokasaun matéria bazika kona-ba tais iha kriasaun kurríkulu nível eskola bázika.
“Ita hahú ona hakarak atu implementa matéria didátika ne’e iha eskola bázika sira tanba durante ne’e ita-nia soru-na’in sira hanorin ema ne’e liu de’it husi saida mak sira tau iha kakutak. Agora ita hakarak matéria sira-ne’e hatama iha kurríkulu atu iha futuru profesór sira bele hanorin ona iha eskola bázika sira,” Irene ba jornalista sira iha Salaun Nobre Ian Martin INFORDEPE, Balide, kinta ne’e.
Tuir nia katak matéria didátika kona-ba tais iha nível eskola bázika ne’e sei ko’alia kona-ba kór kona-ba motif kabas no modelu halo no orijinál tais kada munisípiu nune’e bele halo transmisaun ba jerasaun foun sira tanba husi edukasaun formál de’it mak sei bele hatutan matenek sira ne’ebé mak beiala sira husik hela no bele transmite fali ba jerasaun foun sira atu hatene hodi bele kontinua.
Iha parte seluk, Diretór Servisu Edukasaun Munisípiu Dili, Carlito da Silva relata katak bainhira ko’alia kona-ba tais ne’e asuntu identidade kulturál Timor ne’e mak ida oinsá, nune’e bele promove Timor-Leste ba mundu atu ema seluk labele dúvida ho timoroan rasik ninia moris ne’ebé idéntiku ho ninia lian kultura, lala’ok hatais no ko’alia.
SEAK rasik, nia dehan, tau importánsia hodi envolve profesór sira iha atividade elabora matéria didátika kona-ba tais ne’e tanba sira mak sei kontinua atu eduka estudante sira iha eskola hotu, tanba ne’e tenke tau sira iha atividade sira-ne’e hodi bele fó sira-nia hanoin molok elaborasaun matéria didátika ne’e rasik.
Entretantu, profesóra Inácia de Paula ne’ebé hetan oportunidade hodi partisipa iha workshop elaborasaun matéria didátika ne’e afirma katak atividade ida-ne’e importate duni tanba matéria sira-ne’e molok atu hatama iha kurríkulu profesór sira tenke hetan esplikasaun ida adekuada nune’e bele konvense sira hodi fó mós input ruma ba Governu.
“Hanesan profesora iha nafatin esperansa atu matéria didátika kona-ba tais ne’e tenke hanorin duni iha eskola atu jerasaun foun sira bele hatene no kompriende ho didi’ak identidade Timor nian ne’ebé kulturalmente ida mak tais ne’e rasik,” nia tenik.
Jornalista: Tomé Amado
Editór: Rafael Ximenes de A. Belo
