Ministériu Edukasaun sei hasa’e saláriu profesór transferidu
DILI, 22 dezembru 2023 (TATOLI) – Ministra Edukasaun (ME), Dulce de Jesus Soares promete katak profesór sira ne’ebé tinan oin sei transfere bá eskola seluk iha postu administrativu no munisípiu sira seluk sei hetan saláriu ne’ebé di’ak.
Ministra Dulce deklara iha konferénsia imprensa ne’ebé hala’o iha sala VIP ME, Vila Verde, sesta ne’e katak Ministériu hahú ona implementa kuadru pesoál ba eskola sira hotu iha territóriu Nasional. Husi polítika ne’e rasik sei garante katak tama tinan foun 2024 sei iha prosesu transferénsia ba profesór balun husi eskola ida bá fali eskola seluk atu kompleta nesesidade iha eskola sira ne’ebé mak menus profesór.
“Ha’u hakarak informa katak bainhira iha profesór balun mak tenke hetan transferénsia husi postu administrativu ida bá fali postu administrativu seluk ka husi munisípiu ida bá fali munisípiu seluk, sei iha mudansa ba sira-nia saláriu,” nia esplika.
Nia hatutan katak profesór transferidu sira-nia saláriu sei sa’e ho triplu. Pur-ezemplu, kada fulan profesór ne’e hetan saláriu $400, sei vezes ba tolu. Signifika, profesór ne’e sei hetan $1.200. Maibé, karik iha profesór ida mak sei hetan transferénsia husi munisípiu ida bá fali munisípiu seluk, ninia saláriu ne’e sei sa’e ba dala lima. Signifika, husi $400 saláriu fulan nian vezes ba lima, profesór ne’e sei hetan $2.000.
Polítika ida-ne’e, tuir nia, atu apoiu ba profesór transferidu sira hodibele ajuda sira atu buka rezidénsia ruma nune’e sira bele hela atu hala’o sira nia servisu nu’udar manorin.
Tinan 2025, nia tenik, ministériu foin hanoin atu konstrui rezidénsia ba profesór sira nune’e bele fasilita profesór sira iha servisu tomak.
“Ha’u hakarak dehan Primeiru-Ministru rasik iha hanoin ida katak tinan sira tuir-mai ne’e sei tau mós orsamentu atu konstrui rezidénsia ruma ba profesór sira nune’e ita-nia profesór sira labele halai buka uma atu aluga,” Dulce haktuir.
Rezidénsia profesór ne’ebé ME sei harii iha 2025 ne’e, ministra informa, bele iha resintu eskola, bele mós iha komunidade nia leet. Naran katak rai ne’e pertense ba Ministériu Edukasaun.
Jornalista: Tomé Amado
Editór: Rafael Ximenes de A. Belo
