Konstrusaun EBF Fatuhada atrazu, ME ameasa hapara kontratu ho empreza
DILI, 27 dezembru 2023 (TATOLI) – Ministériu Edukasaun (ME) konsidera konstrusaun progresu fiziku Eskola Bázika Filiál (EBF) Fatuhada atrazu tebes. Tanba ne’e, ministériu ameasa sei hapara kontratu ho empreza Betuhei kuandu la kumpre estensaun tempu ne’ebé ME fó tan ba sira.
Diretór Nasionál Dezenvolvimentu Parque Eskolár (DNDPE), Hélio Lopes relata katak konstrusaun fízika ba EBF Fatuhada loloos ne’e tuir kalendáriu ne’ebé submetidu ne’e tinan ida de’it, hahú husi 2022 tenke finaliza iha 2023, maibé tinan ida liu ona konstrusuan ne’e foin mak atinje progresu fíziku 12% de’it. Tanba ne’e, ministériu foti desizaun halo supervizaun atu haree direta progresu saida mak sira halo ona iha terenu.
“Ami mai halo supervizaun ba konstrusaun Eskola Bázika Filiál Fatuhada ne’e atu haree sira-nia progresu servisu durante tempu barak nia laran to’o ohin, atu ami bele hatene dezenvolvimentu konstrusaun ne’e rasik to’o ona iha ne’ebé, nune’e parte Diresaun Nasionál Dezenvolvimentu Parque Eskolár bele prepara ninia relatóriu sira iha fim do ano 2023 nian,” Hélio ba jornalista iha ME, Vila Verde, kuarta ne’e.
Dirijente ne’e dehan konstrusaun ba obra ne’ebé gasta orsamentu ho montante hamutuk $727,422.58 ne’e ME rasik dúvida ho progresu fíziku ne’ebé mak empeza ne’e sei halo bá-oin tanba agora de’it ninia durasaun tempu liu tiha ona sira foin mak atinje 12%. Kuandu Ministériu Edukasuan hanesan na’in ba projetu fó tan tempu ba sira fulan neen to’o fulan ualu ne’e bele finaliza ka lae?
Hélio hateten ministériu sei akompaña nafatin iha períudu estensaun no la taka dala ba ministériu atu halo desizaun ruma tuir regra kontratuais.
Tuir nia katak konstrusaun EBF ne’e la’ós kestaun atrazu de’it maibé afeta ona direta ba estudante lubuk boot tanba laiha fatin ba sira atu eskola ho hakmatek.
Enkuantu, Side Enginer Empreza Betuhei, Aida Guterres Lobo garante katak sira nafatin halo esforsu atu prosesu konstrusaun eskola EBF Fatuhada ne’ebé hetan estensaun ba fulan neen to’o fulan ualu bele atinje tuir tarjetu ne’ebé iha.
Nia esplika, projetu konstrusaun atrazu tanba enfrenta difikuldade lubuk ida iha terrenu, maibé problema sira-ne’e nia lakohi esplika tanba konsidera problema interna kompañia nian.
Jornalista: Tomé Amado
Editór: Rafael Ximenes de A. Belo
