VIQUEQUE, 27 dezembru 2023 (TATOLI)-Organizasaun naun Governmentál (ONG), Mane ho Vizaun Foun servisu hamutuk hetan apoiu hosi Servisu Apoiu Sosiedade Sívil no Auditóriu Sosiál (SASCAS) apoia fundu $1,000.00 ba grupu feto ho naran Grupu Haksolok, iha aldeia Uelaco, suku Bahara Uain, postu Viqueque Vila, munisípiu Viqueque.
Ofisiál Mane Vizaun Foun, Francisco Tilman Pinto Soares, espresa, objetivu husi apoia fundu ki’ik ida-ne’e ba grupu feto sira hodi halo prevensaun violénsia bazeia ba jéneru ne’ebé dala barak akontese iha família-laran, ema konsidera katak fatór ekonomia maka kontribui ba víolensia doméstika.
“Entaun ami servisu hamutuk ho SASCAS hodi oferese fundu ida-ne’e ba ita-nia feto maluk, atu bele asegura no halo prevensaun víolensia bazeia jéneru iha família uma-kain ida-idak nian. Alende apoia fundu, ami mós oferese ona fomasaun kona-ba violénsia bazeia ba jéneru, klase diskusaun ho inan-aman no formasaun mekanizmu kazu hodi bele redús víolensia bazeia jéneru hasoru feto no labarik kontribui ba pás no establidade iha sosiadade nian leet”, Francisco Tilman Pinto Soares, hateten ba jornalista sira hafoin, distribui fundu ba grupu sira, iha aldeia Uelaco, suku Bahalara Uain, kuarta ne’e.
Francisco hatutan, Mane Vizaun Foun mós oferese formasaun negósiu ki’ik nian ba grupu sira atu halo jestaun ba fundu ki’ik ne’ebé maka grupu sira hetan ona hodi grupu feto sira bele hamriik rasik no bele jere sira-nian ekonomia familiar.
“Fundu ida-ne’e grupu sira bele jere hodi ajuda sira-nia nesesidade bázika sira. Antes ne’e, ami apoia ona fundu ki’ik ne’e ba grupu sira aldeia haat suku Bahalara Uain, agora maka apoia tan fundu ba ita-nia grupu sira husi aldeia Uelaco no Uetali Tua iha suku Bahalara Uain no suku Luca iha aldeia rua”.
“Ba oin ami sei kontinua servisu hamutuk ho SASCAS hodi halo monitoriza ba grupu benifísiariu sira no ami mós hakarak halo espansaun ba atividade prevensaun ba víolensia bazeia jeneiru iha suku suku seluk,” nia garante.
Depois, distrbui fundu Mane Vizaun foun kontinua formasaun ba grupu Haksolok kona-ba negósiu ki’ik nian atu jere fundu tuir planu sira-ne’ebé grupu deside hamutuk.
Iha fatin hanesan, reprezentante xefe Suku Bahalara Uain, Adelino de Araújo, haktuir, meiu prevensaun ba violénsia bazeia jéneiru ne’ebé Mane Vizaun Foun kria ne’e loos tanba fatór ekonomia maka hamosu violénsia iha uma-kain laran.
“Ha’u sente liuhusi apoia fundu no formasaun ba ita-nia grupu feto sira atu bele hasa’e sira-nia koñesementu redús violénsia. Nune’e mós ha’u husu grupu sira jere fundu sira-ne’e ho di’ak hodi fó benifísia ba membru sira-ne’ebé envolve aan grupu ida-ne’e,” nia hato’o.
Iha oportunidade ne’e, Ofisial Polísia Suku (OPS) suku Bahalara Uain, Pedro Caetano Ozorio Bento, hateten, presensa ONG Mane Vizasaun Foun iha suku Bahalara Uain mane tenke muda ona ninia mentalidade hodi redús violénsia tanba ne’e tenke respeita inan-feton sira.
“Ita mane tenke muda ona ita-nia mentalidade hodi redús kazu víolensia bazeia ba jéneru tanba ita mane forsa liu feto sira no mane tenke mós suporta ita-nia feto sira,” nia fó-hanoin.
Iha biban ne’e, Koordenadora Grupu Haksolok, Vringida Gomes, husu agradese ba Mane Vizasaun Foun ne’ebé apoia fundu ba grupu Haksolok atu redús violénsia ne’ebé dala barak akontese iha família-laran.
“Ho fundu ida-ne’e ami sente sufisiente ona nune’e ba oin, ami sei haki’ak manu Timór no kria ortikultura hodi kuda modo, iha ami-nia aldeia Uelaco ida-ne’e. Iha ami-nia grupu feto hamutuk na’in-15 no mane hamutuk na’in-15 ne’ebé envolve ba grupu Haksolok,” nia informa.
Serimónia distribuisaun fundu ki’ik ne’e, ofisiál Mane Vizaun Foun entrega fundu $1,000.00 ba autoridade suku Bahalara Uain no entrega tutan ba koordenadóra Grupu Haksolok.
Iha distribuisaun fundu ki’ik ne’e partisipa husi autoridade lokál husi suku Bahalara Uain, OPS, no membru grupu Haksolok aldeia Uelaco, suku Bahalara Uain.
Jornalista : Vitorino Lopes da Costa
Editór : Rafael Ximenes de A. Belo
