OÉ-CUSSE, 09 janeiru 2024 (TATOLI) – Progresu fíziku implementasaun projetu konstrusaun Uma Naroman ba Povu (UNP) regulár faze daruak iha Rejiaun Administrativa Espesiál Oé-Cusse Ambeno (RAEOA), atinje ona 95%, hosi totál uma unidade 168.
“UNP agora daudaun, ita bele dehan nia servisu tomak atinje ona 95%, ne’ebé falta de’it uma tolu iha aldeia Maunaben suku Cunha maka sei tarde uitoan, inklui mós suku rua iha sub-rejiaun Nítibe, Usitaku ho Lela-Ufe, progresu agora mak iha mudansa la’ós hanesan uluk,” Diretór PNDS Oé-Cusse, João Bobo, ko’alia iha Oé-Cusse, tersa ne’e.
Notísia relevante:Ezekusaun UNP iha Oé-Cusse tarde
Tuir nia, iha fatin hirak-ne’e, la’o tarde, primeiru materiál liga ho fornesedór no traballadór, maibé durante ne’e ekipa PNDS rezolve ona, espera sei remata servisu hotu iha tempu badak nia laran.
“Hela de’it 5% maka seidauk, tanba falta pinta ho dapur no instalasaun ki’ik balu, ba servisu fízikuu kuaze remata ona, maioria suku sira hotu atinje ona 95%, inklui mós sub-rejiaun Pássabe iha suku Abani, nia progresu la’o neineik, maibé ita destaka ekipa mantein iha-ne’ebá nune’e servisu la’o labele tarde,” nia informa..
Notísia relevante:Xefe suku sira husu Parlamentu Nasionál fiskaliza ezekusaun PNDS iha Oé-Cusse
Tuir nia, suku ne’ebé konklui ona 100% no entrega ona ba benefisiáriu sira mak hanesan, iha sub-rejiaun Nítibe iha suku Bene-Ufe, Suni-Ufe, iha sub-rejiaun Pante Makasar, suku Lifau, Lalisuk, Nípani no suku Costa seidauk entrega maibé progresu servisu atinje ona 100%.
“Tuir enkontru ekipa munisípiu nian, katak ita sei entrega totál UNP sira iha fin de janeiru 2024, ne’e ita garante tanba servisu fíziku kuaze remata ona,” nia promete.
Entretantu, suku sira-ne’ebé entrega maka hanesan, Bobokase unidade sia (9), Bene-Ufe 10, Suni-Ufe sia (9), Naimeko sia (9), Lalisuk sia (9), Lifau sia (9), Nípani sia (9), Costa sia (9), Bobometo 12 Usitasa’e neen (6).
“Ne’ebé unidade 91 maka atinje ona 100% balu entrega ona, hela unidade 77 maka seidauk konklui tanba progresu servisu atinje hela 95%,” nia katak.
Notísia relevante: PNDS RAEOA submete ona lista benefisiáriu UKL faze daruak
Jornalista: Abílio Elo Nini
Editór: Evaristo Soares Martins
