Ekipa verifikasaun veteranu rejistadu 2009 ajusta ona dadus ba sistema
DILI, 16 janeiru 2024 (TATOLI)—Ministru Asuntu Kombatente Libertasaun Nasionál (MAKLN), Gil da Costa Monsteiro “Oan Soru”, dehan ekipa verifikasaun dadus veteranu rejistadu 2009 hahú ajusta ona dadus ba sistema hodi hetan rezultadu lista elizivél ba direitu pensaun nian.
Notísia Relevante: Membru PN preokupa verifikasaun dadus veteranu rejistadu 2009
“Atu halo validasaun ne’e tenke ajusta iha sistema no sistema define tuir ema hira mak elezivél no hira mak lae. Ezemplu, ita la tau minutu, oras no loron maibé bainihira tau iha sistema ne’e define kedas oras ida minitu 60 no loron ida iha oras 24. Ida-ne’e ita hahú halo iha tinan 2024 ne’e, no ida-ne’e hotu mak foin tama edital ba sira-ne’ebé elizivél. Maibé edital ne’e sei anúnsia iha tinan 2025,” Governante ne’e hateten ba Agência Tatoli liuhosi program “Entrevista Eskluziva” iha estúdiu Faról, tersa ne’e.
Bainhira ema ida rejistu mak dehan ne’ebá partisipa tinan haat-lima maibé nia segundu (detik) la to’o, labele temi to’o ne’eba tanba ema ida kuandu halo servisu hosi minutu 60 mak oras ida, depois oras 24 mak foin bele konta loos, tanba tuir rekomendasaun hosi tribunál katak TL seidauk iha lista serteza mak labele prevee osan tanba ida-ne’e kontra lei.
“Nune’e ami la tau osan iha 2024. Tanba dadus seidauk definitivu no debate orsamentu ba tinan 2024 nian ne’e iha fulan-dezembru 2023 entaun labele on. Ita labele prevee osan ba programa ida seidauk iha rezultadu. Verifikasaun ne’e ema hotu-hotu partisipa mak ita verifika maibé atu to’o iha validasaun ne’e mak foin bele halo definisaun kona-ba hira mak elizivél no hira mak liuhosi dalan irregularidade ne’e. Ne’ebé, bainhira tama validasaun ne’e ita hetan ona ida-ne’e, maibé hakarak ka lakohi sei termina iha 2025,” nia dehan.
Tanba, tuir nia, bainihira públika sai dadus verifikasaun veteranu rejistadu 2009 mak sei iha reklamasaun hosi públiku ne’ebé rejistu ne’e.
“Dadus tinan 2019 nian mai to’o 2023, ita hotu hatene katak liu ona 13. No iha momentu ne’ebá ha’u ata hanesan Sekretáriu Estadu Veteranu nian no programa verifikasaun dadus veteranu rejistadu tinan 2009 nian, ita hala’o fulan balun tanba pandemia COVID 19 maibé ita konsege verifika 20%. Programa kontinua fali iha 2022, ita vetifika atinje 75% no iha IX Governu ita konsege konklui verifikasaun 25% iha fulan dezembru liubá,” nia hateten.
Maibé, tuir nia, iha nia rekezitu hateten katak validasaun, aprovasaun depois edital, entaun verifikasaun hotu ona, validasaun aprovasaun no edital seidauk bele anúnsia tanba presiza hatene nia rezultadu defenitivu no prinsípiu iha territóriu nasionál.
Nia relata, dadus veteranu rejistadu 2009 nian hamutuk ema 124.680.
Liuhosi konteúdu ne ebé mensiona iha Estatutu Kombatente Libertasaun Nasional, lei númeru 3/2006, no artigu 13 hateten Registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu Kombatente hanesan Libertasaun Nasionál ne ebé rejista ha tinan 2009.
Notísia Relevante: Veteranu rejistadu 2009 ne’ebé verifikadu sei hetan pensaun iha 2025
Jornalista : Osória Marques
Editór : Cancio Ximenes
