DILI, 17 janeiru 2024 (TATOLI)—Governu liuhosi reuniaun ordinária Konsellu Ministru (KM), kuarta ne’e, aprova projetu dekretu-lei ne’ebé aprezenta hosi Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, kona-ba regulamentu Konsellu Nasionál ba Soberania, Seguransa Alimentár no Nutrisaun iha Timor-Leste (KONSSAN-TL).
“Projetu dekretu-lei ida-ne’e ninia objetivu mak atu estabelese kuadru normativa ida ba implementasaun polítika seguransa alimentár no nutrisionál ne’ebé efetiva iha nasaun ne’e,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu.
Notísia relevante : Presiza iha Estatutu KONSSAN-TL Hodi Regula Membru Hotu
Nune’e, diploma ne’e define kompozisaun no responsabilidade KONSSAN-TL nian, estabelese Grupu Traballu Interministeriál no Sekretariadu Tékniku Permanente ida atu apoia koordenasaun no ezekusaun ba polítika sira.
Aleinde ne’e, ezekutivu sira propoin mós hodi kria reprezentasaun munisípiu sira atu asegura implementasaun ne’ebé desentralizada no efikásia hosi diretrís sira ne’ebé estabelese ona.
“Objetivu finál mak atu garante abordajen ne’ebé koordenada no efisiente iha promosaun seguransa alimentár no nutrisionál iha Timor-Leste,” Ministru akresenta.
Jornalista : Antónia Gusmão
Editora : Julia Chatarina
