iklan

KAPITÁL

In memoriam: Maestro múzika litúrjika Pe. Ildefonso Xavier lakon vida

In memoriam: Maestro múzika litúrjika Pe. Ildefonso Xavier lakon vida

Pe. Ildefonso Xavier. Imajen/Fb Pe. Benito Barros Pereira

DILI, 25 janeiru 2024 (TATOLI) – Timor-Leste Lutu. Igreja Katólika lutu. Timoroan sira lutu. Lutu tan lakon bibi-atan ida. Lutu tan lakon Nai-lulik ida. Maestro múzika litúrjika ida, Pe. Ildefonso Xavier la’o uluk ona ba mundu eternidade, fatin rohan-laek nian.

Padre Natalino da Costa, Reitór semináriu Balide, hateten, matebian padre Padre Ildefonso Xavier dedika nia aan ba uma kreda liuhosi múzika litúrjiku.

“Ha’u pesoalmente hanesan estudante ida, Padre Ildefonso Xavier ema múziku. Ema espesialidade iha múzika no kompozitór bo’ot múzika igreja nian. Múziku bo’ot ida. Ema ne’ebé matenek iha área múzika nian”, saserdote ne’e afirma, iha igreja Katedrál Dili.

Na’i-lulik ne’e reforsa, saudozu dedika nia aan ba liturjia iha múzika iha nia moris. “Ha’u bele fó testemuña katak múzika iha liturjia iha mudansa depois de Timor-Leste ukun rasik aan. Hetan ritmu kona-ba múzika iha liturjia ne’e Amu Ildefonso nia kontribuisaun”, nia haktuir.

Pe. Natalino relembra, matebian Amu Ildefonso ema ne’ebé haraik aan no dezfruta ka goza nia moris hanesan múziku ho bele hanorin ema.

Nune’e mós, Natalino Barros deskreve amu matebian katak dosente ida ne’ebé iha fuan atu eduka no transmite nia matenek ba nia oan sira ho fuan. “Nia simu ho fuan no fahe ho fuan ba estudante sira no kandidatu Na’i-lulik sira atu aprende buat ne’ebé nia hatene,” Barros haktuir.

Padre matebian Ildefonso Xavier sei halo’ot iha semitériu Maloa Ailok Laran, aban tuir orariu sei iha misa tuku rua lorokraik no tuir misa sei lori ba halo’ot.

“Ita velada ohin kalan to’o aban no tuku rua lorokraik sei iha misa no tuir serimónia fúnebre ba halo’ot iha semitériu Maloa Ailok-laran,” nia informa.

Iha parte seluk, Adolfo da Silva hanesan subriñu hosi padre matebian Ildefonso Xavier senti triste no lakon ema di’ak hosi família ne’ebé oferese aan ba Maromak no sai bibi-atan di’ak ba nia sarani hotu.

“Ami senti triste no igreja Timor hotu lakon nia bibi-atan di’ak no ema di’ak ne’ebé kontribui ba múzika liturjia iha Timór, maibé Maromak hadomi liu nia” dehan iha salaun katedral Vila Verde.

Nia hateten, Amu Ildefonso di’ak ba ema hotu no nia la’ós haree ba família, tanba nia sai husik família iha tinan barak no hela kle’ur iha Portugal.

Nia konta, ema se de’it nia sempre haree hanesan hotu de’it, maske ema seluk hili dehan ida ne’e família ida ne’e ema seluk.

Padre Ildefonso Xavier hala’o tratamentu iha Hospital Nasional Guido Valadares (HNGV), durante semana tolu nia laran, ohin hakotu ona iis iha oras tuku 7:45 dadersan, tanba moras komplikadu ho fuan.

Moris iha Dug Hau, suku Luga-tu, postu administravu Ainaro, munisípiu Ainaro iha loron 17 fulan maiu 1952, oan hosi Adelino dos Reis no Adelina Xavier.

Padre Ildefonso Xavier hala’o nia estudu iha área múzika iha Portugal no nia misaun tinan barak iha Portugal. Nia fila mai Timor-leste hanesan profesor língua portugeza iha Universidade Católica Timorense iha Balide.

Amo Ildefonso Xavier, Maestro múzika litúrjika, termina nia jornada moris ho idade 72. Requiescat in pace!

 

Eu sou a ressurreição e a vida; quem crê em mim, ainda que esteja morto, viverá; e todo aquele que vive, e crê em mim, nunca morrerá”. (João 11:25-26)

 

Jornalista: Jesuína Xavier

Editór       : Rafael Ximenes de A. Belo

iklan
iklan

Leave a Reply

iklan
error: Content is protected !!